കോട്ടയം: വൈകീട്ട് എന്തെങ്കിലും കഴിക്കുന്നത് ചിലരുടേങ്കിലും ശീലമാണ് അല്ലെ, എങ്കില് ഇനി വൈകീട്ട് കഴിക്കാൻ ഈ ഒരു സ്നാക്ക് തയ്യാറാക്കിക്കോളൂ.
കിടിലൻ സ്വാദില് തയ്യാറാക്കാവുന്ന എഗ്ഗ് 65 റെസിപ്പി നോക്കാം.
ആവശ്യമായ ചേരുവകള്
മുട്ട -5
ഇഞ്ചി- 1 ടീ സ്പൂണ്
സവാള- 3
പച്ചമുളക് -4
വെളുത്തുള്ളി- 3 , 4 എണ്ണം ചതച്ചത്
ഗരം മസാല- 1 ടീ സ്പൂണ്
കാശ്മീരി ചില്ലി – 2 ടീ സ്പൂണ്
കടലമാവ് -200 ഗ്രാം
ഉപ്പ്
ടൊമാറ്റോ സോസ്-2 സ്പൂണ്
തയ്യാറാക്കുന്ന വിധം
മുട്ട പുഴുങ്ങി വെള്ള മാത്രം മാറ്റി ചെറുതായി അരിഞ്ഞെടുക്കുക. ഇഞ്ചി, സവാള , വെളുത്തുള്ളി എന്നിവ ചെറുതായി അരിഞ്ഞു വെക്കാം. അതിലേക്ക് ഗരം മസാല, കുറച്ചു കാശ്മീരി ചില്ലി, ആവശ്യത്തിന് ഉപ്പും ചേർത്ത് അരിഞ്ഞു വെച്ചിട്ടുള്ള മുട്ടയും ചേർത്ത ഇളക്കുക. ഒപ്പം കടലമാവും ചേർത്ത് കൊടുക്കാം. അതിനുശേഷം ഒരു പച്ച മുട്ട പൊട്ടിച്ച് അതിന്റെ കൂടെ ഒഴിച്ച് നന്നായി ഇളക്കുക.
ഒരു ഫ്രൈ പാനില് എണ്ണ ഒഴിച്ച് പച്ച മുട്ട മിക്സ് ഓരോ ഉരുളകളാക്കി ഉരുട്ടി ചൂടായ എണ്ണയില് ഇട്ട് നന്നായി വറുത്തു കോരി മാറ്റി വെക്കുക. മറ്റൊരു ചീനച്ചട്ടിയില് എണ്ണയൊഴിച്ച് രണ്ട് സ്പൂണ് വെളുത്തുള്ളി അരിഞ്ഞത് ചേർക്കുക, കറിവേപ്പിലയും ചേർത്തു കൊടുക്കാം. ഒപ്പം പച്ചമുളകും ചേർത്തു ഇത് നന്നായി വഴന്നു കഴിഞ്ഞാല് തയ്യാറാക്കി വെച്ചിട്ടുള്ള വറുത്ത മുട്ടയും ഇതിനൊപ്പം ചേർത്തു കൊടുക്കാം. എല്ലാം നന്നായി ഇളക്കി യോജിപ്പിച്ചതിനു ശേഷം അതിലേക്ക് കാശ്മീരി ചില്ലി, ടൊമാറ്റോ സോസും ചേർത്ത് വീണ്ടും നന്നായി ഇളക്കുക. വളരെ രുചികരവും ഹെല്ത്തിയുമായ എഗ്ഗ് 65 തയ്യാർ.
