നെബ്രാസ്ക: സംസ്കാര നടപടികൾക്കായി എത്തിച്ച മൃതദേഹം. ചടങ്ങുകൾക്ക് തുടക്കം കുറിച്ചപ്പോൾ ആരേയും ഞെട്ടിച്ച് ജീവനോടെ ശ്വാസമെടുക്കുന്നു. നഴ്സിംഗ് ഹോമിൽ വച്ച് മരിച്ചുവെന്ന് സ്ഥിരീകരിച്ച 74കാരിയുടെ മൃതദേഹമാണ് സംസ്കാര ചടങ്ങുകൾക്കിടയിൽ ജീവൻ തിരിച്ചു പിടിക്കാൻ ആഞ്ഞ് ശ്വാസമെടുത്തത്.
ഉടൻ തന്നെ 74കാരിയെ ആശുപത്രിയിലേക്ക് മാറ്റാൻ ശ്രമിച്ചെങ്കിലും ആംബുലൻസിൽ വച്ച് മരണത്തിന് കീഴടങ്ങുകയായിരുന്നു. സംഭവത്തിൽ അന്വേഷണം ആരംഭിച്ചതായാണ് നെബ്രാസ്കയിലെ പൊലീസ് ചൊവ്വാഴ്ച വിശദമാക്കിയത്. അമേരിക്കൻ സംസ്ഥാനമായ നെബ്രാസ്കയിലാണ് സംഭവം. 74കാരി മരിച്ചതായി വൃദ്ധസദനത്തിലെ ജീവനക്കാർ സ്ഥിരീകരിച്ചതോടെ മൃതദേഹം സംസ്കാര ചടങ്ങുകൾക്കായി ഫ്യൂണറൽ ഫോമിലേക്ക് മാറ്റുകയായിരുന്നു.
എന്നാൽ, ഇവിടെയെത്തി മണിക്കൂറുകൾക്ക് ശേഷമാണ് മൃതദേഹം ശ്വസിക്കാൻ ശ്രമിക്കുന്നവെന്ന് ഫ്യൂണറൽ ഹോം അധികൃതർ അറിയിക്കുന്നത്. ഉടൻതന്നെ അവശ്യസേനയുടെ സഹായം തേടി. ഫ്യൂണറൽ ഹോമിലെ ജീവനക്കാർ 74കാരിക്ക് സിപിആർ അടക്കമുള്ളവ നൽകി ജീവൻ തിരികെ പിടിക്കാനുള്ള ശ്രമങ്ങളും നടത്തി. പിന്നാലെ പൊലീസ് അടക്കമുള്ള ഉദ്യോഗസ്ഥരെത്തി ‘മൃതദേഹം’ ആശുപത്രിയിലേക്ക് കൊണ്ടുപോവുകയായിരുന്നു.
എന്നാൽ ആംബുലൻസിൽ വച്ച് 74കാരി മരണത്തിന് കീഴടങ്ങുകയായിരുന്നു. സംഭവത്തിലെ ദുരൂഹത നീക്കാനായി മൃതദേഹം പോസ്റ്റ്മോർട്ടം ചെയ്തു. അസാധാരണ സംഭവമാണുണ്ടായതെന്നാണ് പൊലീസ് വിശദമാക്കുന്നത്. 31 വർഷത്തോളമായി ഫ്യൂണറൽ ഹോം നടത്തുന്നുണ്ടെങ്കിലും ഇത്തരമൊരു സംഭവം ആദ്യമെന്നാണ് സംസ്കാര നടപടികൾക്കായി മൃതദേഹം ഏറ്റുവാങ്ങിയ ജീവനക്കാർ പ്രതികരിക്കുന്നത്.
