തിരുവനന്തപുരം: ക്രിസ്മസ്-പുതുവത്സര ഉത്സവ സീസണ് പ്രമാണിച്ച് അധിക അന്തർ സംസ്ഥാന സർവീസുകള് ഏർപ്പെടുത്താൻ കെഎസ്ആർടിസി.
കേരളത്തില് നിന്നും ബെംഗളൂരു, ചെന്നൈ, മൈസൂർ തുടങ്ങിയ പ്രധാന നഗരങ്ങളിലേക്കുള്ള സ്ഥിരം 48 സർവീസുകള്ക്ക് പുറമേ 38 ബസുകള് കൂടിയാണ് അധികമായി സർവീസ് നടത്തും. ഇതോടെ അവധിക്കാലത്തെ തിരക്കില് യാത്രക്കാർക്ക് വലിയ ആശ്വാസമാവുകയാണ്.
34 ബെംഗളൂരു ബസുകളും നാല് ചെന്നൈ ബസുകളുമാണ് അധികം സർവീസ് നടത്തുന്നത്.
ശബരിമല സ്പെഷല് അന്തർസംസ്ഥാന സർവീസുകള്ക്ക് പുറമെയാണ് ഇത്. യാത്രക്കാർക്ക് ഓണ്ലൈൻ റിസർവേഷൻ ചെയ്യാനുള്ള സൗകര്യങ്ങളുമുണ്ട്.
നാല് ലോഫ്ലോർ, നാല് മിന്നല്, മൂന്ന് ഡീലക്സ്, അഞ്ച് സൂപ്പർഫാസ്റ്റ് ബസുകള് അടക്കം 16 ബസുകള് ഉപയോഗിച്ച് തിരുവനന്തപുരത്ത് നിന്നും കണ്ണൂർ ,തിരുവനന്തപുരം കോഴിക്കോട് റൂട്ടില് ദിവസവും എട്ടു സർവീസുകള് നടത്തും.
തിരക്കൊഴിവാക്കി സുഗമയാത്രക്കായി തിരുവനന്തപുരം, കോഴിക്കോട്,കണ്ണൂർ റൂട്ടിലും 24 ബസുകള് കൂടി അധികമായി സർവീസ് നടത്തും.
നാല് വോള്വോ ബസുകള് കോഴിക്കോട്, തിരുവനന്തപുരം റൂട്ടിലും. നാല് ബസുകള് കോഴിക്കോട്, എറണാകുളം റൂട്ടിലും അടക്കം എട്ടു ബസുകള് കോഴിക്കോട് നിന്ന് അധികമായും ഓടും.
