തൃശൂര്: കൊടകര കുഴല്പ്പണക്കേസില് പ്രത്യേക അന്വേഷണസംഘം ഉടൻ തുടർനടപടികളിലേക്ക് കടക്കുമെന്ന് വിവരം.
ബിജെപി മുൻ ഓഫീസ് സെക്രട്ടറി തിരൂർ സതീശിന്റെ കഴിഞ്ഞ ദിനവസത്തെ വെളിപ്പെടുത്തലിന് പിന്നാലെ ആഭ്യന്തര വകുപ്പ് തുടരന്വേഷണത്തിന് ഉത്തരവിട്ടിരുന്നു.
എന്നാല്, തുടരന്വേഷണത്തില് കോടതിയെ സമീപിക്കുന്നത് പുതിയ വെളിപ്പെടുത്തല് പരിശോധിച്ച ശേഷം മതിയെന്നാണ് പൊലീസിന്റെ തീരുമാനം.
ഇരിങ്ങാലക്കുട ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് നിന്ന് അനുമതി നേടിയ ശേഷമായിരിക്കും തുടർനടപടിയിലേക്ക് കടക്കുക. ഒരുതവണ കുറ്റപത്രം സമർപ്പിച്ച കേസ് ആയതിനാല് കോടതിയുടെ അനുമതി നേടിയ ശേഷമേ തുടർനടപടികളിലേക്ക് കടക്കാനാവൂ.
അനുമതി ലഭിച്ചാല് ഇന്ന് തന്നെ സതീശിന്റെ മൊഴി രേഖപ്പെടുത്താനാണ് പൊലീസ് നീക്കം. മുൻപ് കേസന്വേഷിച്ച അതേ സംഘത്തെ തന്നെയാണ് തുടരന്വേഷണത്തിനും ആഭ്യന്തര വകുപ്പ് നിയോഗിച്ചിട്ടുള്ളത്.
