ന്യൂഡൽഹി: ഇറാനിലെ രാഷ്ട്രീയ സംഘർഷങ്ങള് വർദ്ധിച്ചുവരുന്ന സാഹചര്യത്തില് ഈ വർഷം ഫെബ്രുവരി 28 വരെ ടിബിലിസി, അല്മാറ്റി, ബാക്കു, താഷ്കന്റ് എന്നിവിടങ്ങളിലേക്കും തിരിച്ചുമുള്ള വിമാനങ്ങള് റദ്ദാക്കുന്നതായി ഇൻഡിഗോ അറിയിച്ചു.
ഇറാനലെ സാഹചര്യം കണക്കിലെടുത്ത് യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിനാണ് തീരുമാനമെടുത്തതെന്ന് എയർലൈൻ പ്രസ്താവനയില് പറഞ്ഞു.
ഇറാനു ചുറ്റുമുള്ള നിലവിലെ രാഷ്ട്രീയ സാഹചര്യം കണക്കിലെടുത്ത്, ഞങ്ങളുടെ ഉപഭോക്താക്കള്ക്കും ജീവനക്കാർക്കും സുരക്ഷിതവും തടസ്സമില്ലാത്തതുമായ അനുഭവം ഉറപ്പാക്കുന്നതിന് ഷെഡ്യൂളില് കൂടുതല് മാറ്റങ്ങള് വരുത്തി. ഈ നടപടികളുടെ ഭാഗമായി, ടിബിലിസി, അല്മാറ്റി, ബാക്കു, താഷ്കന്റ് എന്നിവിടങ്ങളിലേക്കും തിരിച്ചുമുള്ള ഇൻഡിഗോ വിമാനങ്ങള് 2026 ഫെബ്രുവരി 28 വരെ റദ്ദാക്കി. സ്ഥിതിഗതികള് വികസിച്ചുകൊണ്ടിരിക്കുന്നതിനാല്, പതിവായി അവലോകനം ചെയ്തുകൊണ്ടിരിക്കും. കൂടുതല് അപ്ഡേറ്റുകളോ മാറ്റങ്ങളോ അറിയിക്കുമെന്നും ഇൻഡിഗോ അറിയിച്ചു.
നിലവിലെ സാഹചര്യം കണക്കിലെടുത്ത്, ഇന്ത്യയില് നിന്ന് ഈ നഗരങ്ങളിലേക്കുള്ള വിമാനങ്ങള്ക്ക് സാധാരണയായി ആറ് മുതല് ഏഴ് മണിക്കൂർ വരെ എടുക്കും. കൂടാതെ A320 നിയോ വിമാനങ്ങള് ഉപയോഗിച്ചാണ് ഇവ സർവീസ് നടത്തുന്നത്. ഇവയ്ക്ക് കൂടുതല് ബദല് റൂട്ടുകളില് പറക്കാനുള്ള ഇന്ധന ശേഷിയില്ല. ഇറാനും അമേരിക്കയും തമ്മിലുള്ള സംഘർഷം സമീപ ആഴ്ചകളില് രൂക്ഷമായി. പശ്ചിമേഷ്യയില് യുഎസ് നാവിക സേനയെ വിന്യസിക്കുന്നതിനെതിരെ ഇറാൻ ശക്തമായ മുന്നറിയിപ്പുകള് നല്കി.
