തിരുവനന്തപുരം: സംസ്ഥാന ജീവനക്കാർക്കും അദ്ധ്യാപകർക്കും ഒരു ഗഡു ക്ഷാമ ബത്ത അനുവദിച്ചു.
സർവീസ് പെൻഷൻകാർക്കുള്ള ക്ഷാമാശ്വാസവും ഒരു ഗഡു അനുവദിച്ചതായി ധനമന്ത്രി കെ എൻ ബാലഗോപാല് അറിയിച്ചു. യുജിസി, എഐസിടിഇ, മെഡിക്കല് സർവീസ് ഉള്പ്പെടെ എല്ലാ മേഖലയിലും ഡിഎ, ഡിആർ വർദ്ധനവിന്റെ ആനുകൂല്യം ലഭിക്കും.
ഇതുവഴി സർക്കാരിന്റെ വാർഷിക ചെലവില് ഏകദേശം 2000 കോടി രൂപയുടെ വർദ്ധനവുണ്ടാകും. അനുവദിച്ച ഡിഎ, ഡിആർ അടുത്ത മാസത്തെ ശമ്പളത്തിനും പെൻഷനുമൊപ്പം കിട്ടിതുടങ്ങും.
ഒരു ഗഡു ഡിഎ, ഡിആർ ഈ വർഷം ഏപ്രിലില് അനുവദിച്ചിരുന്നു. ഈ സാമ്പത്തിക വർഷം മുതല് പ്രതിവർഷം രണ്ടു ഗഡു ഡിഎ, ഡിആർ ജീവനക്കാർക്കും പെൻഷൻകാർക്കും അനുവദിക്കാനാണ് സർക്കാർ ഉദ്ദേശിക്കുന്നതെന്ന് മുഖ്യമന്ത്രി നിയമസഭയില് വ്യക്തമാക്കിയിരുന്നു.
