വൃത്തിയാക്കല് പരിപാടി അത്ര സുഖമുള്ള കാര്യമല്ല എന്നതില് സംശയമില്ല. എന്നാല് ചിലർക്ക് ഇത് സ്ട്രെസ് ഒഴിവാക്കാനുള്ള മാർഗ്ഗമാണ്.
എന്നാല് മറ്റുചിലർക്ക് ഇത് കാഠിന്യമേറിയ പണിയുമാണ്. അടുക്കളയില് ഓരോ വസ്തുക്കളും ഉപകരണങ്ങളും പ്രത്യേകം തന്നെയാണ് വൃത്തിയാക്കേണ്ടത്. കാരണം ഓരോന്നിനും ഓരോ രീതിയാണല്ലോ ഉള്ളത്. അടുക്കളയില് ഒഴിവാക്കാൻ കഴിയാത്ത ഒന്നാണ് എക്സ്ഹോസ്റ്റ് ഫാൻ. എന്നാല് ഇതില് അമിതമായി പൊടിയുണ്ടാവുകയും പിന്നീട് ഇത് പ്രവർത്തിക്കാത്ത സാഹചര്യം ഉണ്ടാവുകയും ചെയ്യുന്നു. ഇത് ഒഴിവാക്കാൻ കൃത്യമായ ഇടവേളകളില് എക്സ്ഹോസ്റ്റ് വൃത്തിയാക്കിയാല് മതിയാകും. ഈ കാര്യങ്ങള് ചെയ്താല് മതി.
ചൂടുവെള്ളവും സോപ്പും
ഒരു കപ്പ് ചൂടുവെള്ളത്തില് കുറച്ച് ഡിഷ് വാഷ് സോപ്പിട്ട് മിക്സ് ഉണ്ടാക്കണം. ശേഷം അതിലേക്ക് തുണി മുക്കി എക്സ്ഹോസ്റ്റ് ഫാൻ തുടച്ചെടുത്താല് മതി. തുടക്കുമ്പോള് എല്ലാ ഭാഗങ്ങളും വൃത്തിയാക്കാൻ ശ്രദ്ധിക്കണം. അതിനുശേഷം വൃത്തിയുള്ള തുണി ഉപയോഗിച്ച് തുടച്ചെടുക്കണം.
ബേക്കിംഗ് സോഡ
ബേക്കിംഗ് സോഡ ഉപയോഗിച്ച് എന്തും എളുപ്പത്തില് വൃത്തിയാക്കാൻ സാധിക്കും. കടുത്ത ഏത് കറയേയും എളുപ്പത്തില് നീക്കം ചെയ്യാൻ ബേക്കിംഗ് സോഡയ്ക്ക് സാധിക്കും. കുറച്ച് വെള്ളത്തില് ഒരു ടീസ്പൂണ് ബേക്കിംഗ് സോഡ ചേർത്ത് കുഴമ്പ് രൂപത്തിലാക്കണം. വെള്ളത്തിന്റെ അംശം കുറച്ച് വേണം പേസ്റ്റ് ഉണ്ടാക്കേണ്ടത്. ഇത് ഫാനില് തേച്ചുപിടിപ്പിച്ച ശേഷം വൃത്തിയുള്ള തുണി ഉപയോഗിച്ച് തുടച്ചെടുക്കാവുന്നതാണ്.
നാരങ്ങ നീര്
ചൂട് വെള്ളത്തില് നാരങ്ങ നീര് ചേർത്ത് ഡിഷ് വാഷ് ഉപയോഗിച്ച് വൃത്തിയാക്കണം. ഇത് ഫാനില് പറ്റിയിരിക്കുന്ന ഏത് കറയേയും എളുപ്പത്തില് നീക്കം ചെയ്യാൻ സഹായിക്കുന്നു. ആവശ്യമെങ്കില് നാരങ്ങ തോട് ഉപയോഗിച്ചും വൃത്തിയാക്കാവുന്നതാണ്.
