കോട്ടയം: പോഷകാഹാരത്തിന്റെ കലവറ എന്നറിയപ്പെടുന്ന മുട്ട നമ്മുടെയെല്ലാം ആഹാരക്രമത്തില് മിക്കവാറും ഉള്പ്പെടുത്താറുള്ള ഒന്നാണ്.
ഏറെ പോഷകഗുണങ്ങളടങ്ങിയ മുട്ടയെ നാം പല രീതിയിലാണ് ആഹാര ക്രമത്തില് ഉള്പ്പെടുത്തുന്നത്. പുഴുങ്ങിയും, കറിവെച്ചും, തോരൻ വെച്ചുമെല്ലാം നാം മുട്ട കഴിക്കാറുണ്ട്. മുട്ടയില് ഫോളേറ്റ്, വിറ്റാമിന് എ, ബി5, ബി12, ബി2, ഫോസ്ഫറസ്, സെലിനിയം, കാല്സ്യം, സിങ്ക് എന്നിവ ധാരാളമായി അടങ്ങിയിട്ടുണ്ട്. ഒരു മുട്ട ഏകദേശം 6 ഗ്രാം പ്രോട്ടീനാണ് നല്കുന്നത്. എന്നാല് മുട്ട വാങ്ങുമ്പോള് നല്ല മുട്ടയാണോ മോശം മുട്ടയാണോ എന്ന് നോക്കി വാങ്ങാൻ നമുക്ക് പലപ്പോഴും കഴിയാറിലല്ല. വ്യാജ മുട്ടകള് ഉപയോഗിക്കുന്നത് ഭക്ഷ്യ വിഷബാധയ്ക്ക് വരെ കാരണമാകുന്നു. മുട്ടയിലെ വ്യാജനെ കണ്ടെത്താനും വഴികളുണ്ട് അതിനായുള്ള ചില വിദ്യകള് ഇതാ.
മുട്ടയിലെ വ്യാജനെ കണ്ടെത്താനുള്ള വഴികള്
* മുട്ട കയ്യിലെടുത്ത് കുലുക്കി നോക്കുക. കുലുക്കുമ്പോള് മുട്ടയുടെ ഉള്ളില് നിന്നും വെള്ളം കുലുങ്ങുന്നതുപോലെയൊരു ശബ്ദം കേള്ക്കുന്നുണ്ടെങ്കില് അത് യഥാര്ഥ മുട്ടയാണ്.
* കുറച്ച് വെള്ളത്തിലേക്ക് മുട്ട ഇട്ടാല് അത് പൊങ്ങി കിടക്കുകയോ ഒഴുകി നടക്കുകയോ ആണെങ്കില് അത് ചീഞ്ഞ മുട്ടയായിരിക്കും. അതേ സമയത്ത് മുട്ട വെള്ളത്തിനടിയിലേക്ക് താഴ്ന്നുപോവുകയാണെങ്കില് അത് നല്ല മുട്ടയാണെന്ന് ഉറപ്പിക്കാം.
* മുട്ട പൊട്ടിച്ചൊഴിക്കുമ്ബോള് മുട്ട വെള്ളയും മഞ്ഞയും കലര്ന്നിരിക്കുകയാണെങ്കില് അത് ചീഞ്ഞ മുട്ടയായിരിക്കും.
* മുട്ട വ്യാജനാണെങ്കില് അതിന്റെ പുറംതോടിന് നല്ല കട്ടിയായിരിക്കും.
നല്ല മുട്ടയ്ക്ക് സ്വാഭാവികമായ മണം ഉണ്ടായിരിക്കും, വ്യാജ മുട്ടയാണെങ്കില് ചിലതിന് അമിതമായ ഗന്ധവും ചിലതിന് ഗന്ധം ഉണ്ടാവുകയുമില്ല.
* മുട്ട പൊട്ടിച്ചു നോക്കുമ്പോള് മുട്ടയുടെ മഞ്ഞയില് ചുവപ്പ് നിറമോ മറ്റോ കാണുകയാണെങ്കില് അത് ചീഞ്ഞതാണ്.
