കോട്ടയം: ഉപയോക്താക്കള്ക്കായി പുതിയൊരു ഫീച്ചർ അവതരിപ്പിച്ച് വാട്സ്ആപ്പ്. വാട്സ്ആപ്പിനെ ഡിഫോള്ട്ട് കോളിംഗ്, മെസേജിംഗ് ആപ്പായി സജ്ജമാക്കാൻ പ്രാപ്തമാക്കുന്നതാണ് പുതിയ ഫീച്ചർ.
നിലവില് ഐഫോണ് ഉപയോക്താക്കള്ക്കായിട്ടാണ് വാട്സ്ആപ്പ് ഈ പുതിയ സവിശേഷത അവതരിപ്പിച്ചത്. ഏറ്റവും പുതിയ iOS 18.2 അപ്ഡേറ്റ് ഉപയോഗിച്ച്, കോളുകള് ചെയ്യുമ്പോഴോ സന്ദേശങ്ങള് അയയ്ക്കുമ്ബോഴോ ഐഫോണുകള്ക്ക് ഇപ്പോള് ഡിഫോള്ട്ട് ഫോണ് അല്ലെങ്കില് മെസേജസ് ആപ്പിന് പകരം വാട്സ്ആപ്പ് ഉപയോഗിക്കാൻ കഴിയും.
ഈ സവിശേഷതയിലൂടെ, ഉപയോക്താക്കള്ക്ക് കോളുകള്ക്കും സന്ദേശങ്ങള്ക്കുമായി വാട്സ്ആപ്പിനെ ഡിഫോള്ട്ട് ആപ്പായി സജ്ജമാക്കാൻ കഴിയും. അതായത്, വ്യത്യസ്ത ആപ്പുകള്ക്കിടയില് മാറാതെ തന്നെ നിങ്ങള്ക്ക് ഇപ്പോള് വാട്സ്ആപ്പില് നിന്ന് നേരിട്ട് കോളുകള് വിളിക്കാനും സന്ദേശങ്ങള് അയക്കാനും കഴിയും. വാട്സ്ആപ്പിന്റെ ഐഫോണ് ബീറ്റ പതിപ്പ് 25.8.10.74 ഉപയോഗിക്കുന്ന ചില ഉപയോക്താക്കള്ക്ക് ഈ സവിശേഷത ലഭിച്ചു തുടങ്ങിയതായി ട്രാക്കറായ WABetaInfo റിപ്പോർട്ട് ചെയ്യുന്നു. ചില ബീറ്റാ ടെസ്റ്റർമാർക്ക് ഇപ്പോള് ഐഫോണിലെ കോളുകള്ക്കും സന്ദേശങ്ങള്ക്കുമായി വാട്സ്ആപ്പ് അവരുടെ ഇഷ്ടപ്പെട്ട ആപ്പായി തിരഞ്ഞെടുക്കാം.
ഈ അപ്ഡേറ്റ്, ഐഫോണ് സെറ്റിംഗ്സിലെ ഡിഫോള്ട്ട് ആപ്പ് സെലക്ഷൻ മെനുവില് വാട്സ്ആപ്പ് ലഭിക്കാൻ അനുവദിക്കുന്നു. ഉപയോക്താക്കള്ക്ക് ഇപ്പോള് കോളിംഗിനും സന്ദേശമയക്കലിനും വാട്സ്ആപ്പ് തിരഞ്ഞെടുക്കാം. ഇത് വാട്സ്ആപ്പിനെ ദൈനംദിന ആശയവിനിമയത്തിന് കൂടുതല് സൗകര്യപ്രദമാക്കുന്നു. ഈ ഫീച്ചർ സജ്ജമാക്കാൻ ആപ്പ് സ്റ്റോറില് നിന്ന് വാട്സ്ആപ്പ് ഏറ്റവും പുതിയ പതിപ്പിലേക്ക് അപ്ഡേറ്റ് ചെയ്യണം.
തുടർന്ന് നിങ്ങളുടെ ഐഫോണില് സെറ്റിംഗ്സ്- ആപ്പുകള് -ഡിഫോള്ട്ട് ആപ്പുകള് എന്നതിലേക്ക് പോകുക. കോളുകള്ക്കും സന്ദേശങ്ങള്ക്കും ഡിഫോള്ട്ടായി വാട്സാപ്പ് തിരഞ്ഞെടുക്കുക. സജ്ജീകരിച്ചുകഴിഞ്ഞാല്, ഒരു കോണ്ടാക്റ്റിന്റെ നമ്പറോ സന്ദേശ ബട്ടണോ ടാപ്പ് ചെയ്യുമ്പോള്, ബില്റ്റ്-ഇൻ ആപ്പുകള്ക്ക് പകരം ഐഫോണ് ഓട്ടോമാറ്റിക്കായി വാട്ട്സ്ആപ്പ് തുറക്കും.
തുടക്കത്തില്, ഈ സവിശേഷത യൂറോപ്യൻ യൂണിയനില് മാത്രമേ ലഭ്യമാകൂ എന്ന് പ്രതീക്ഷിച്ചിരുന്നെങ്കിലും, ആപ്പിള് ഇത് ആഗോളതലത്തില് അവതരിപ്പിച്ചു. iOS-ലെ വിശാലമായ മാറ്റങ്ങളുടെ ഭാഗമാണ് ഈ നീക്കം എന്നാണ് റിപ്പോർട്ടുകള്. അതേസമയം വാട്സ്ആപ്പ് ബീറ്റ പതിപ്പ് ഉപയോഗിച്ചുള്ള തിരഞ്ഞെടുത്ത ഉപയോക്താക്കള്ക്ക് മാത്രമേ നിലവില് ഈ സവിശേഷത ലഭ്യമാകൂ എന്നും റിപ്പോർട്ടുകള് ഉണ്ട്. എല്ലാ ഉപയോക്താക്കള്ക്കും ഇത് എപ്പോള് ലഭ്യമാകുമെന്ന് ഇതുവരെ വ്യക്തമല്ല.
