ആലപ്പുഴ: സർക്കാർ സ്കൂളിലേക്ക് തോക്കുമായെത്തിയ പ്ലസ് വണ് വിദ്യാർത്ഥി സഹപാഠിക്ക് നേരെ വെടിയുതിർത്തു. ഞെട്ടിക്കുന്ന സംഭവം ആലപ്പുഴയിൽ. പ്ലസ് വണ് വിദ്യാർത്ഥികള് തമ്മിലുണ്ടായ തർക്കത്തിനിടെയാണ് സംഭവം.
നഗരത്തിലെ സർക്കാർ സ്കൂളിനു മുന്നിലെ റോഡരികില് ചൊവ്വാഴ്ച ഉച്ചയോടെയാണ് വെടിവെപ്പുണ്ടായത്. നിസാര വഴക്കിനെ തുടർന്നുണ്ടായ സംഘർഷം വെടിവെപ്പില് കലാശിക്കുകയായിരുന്നു. സ്കൂളിലെ പ്ലസ് വണ് വിദ്യാർത്ഥി സഹപാഠിക്കു നേരേ വെടിയുതിർക്കുകയായിരുന്നു.
ആക്രമണത്തില് ആർക്കും സാരമായ പരിക്കില്ല. വിദ്യാർത്ഥികള് തമ്മില് സ്കൂള്വളപ്പില് അസഭ്യം പറഞ്ഞതുമായി ബന്ധപ്പെട്ട തർക്കാണ് അടിപിടിയിലെത്തിയത്. പിന്നീട് ഉച്ചഭക്ഷണ സമയത്ത് സ്കൂളിന് പുറത്തുവെച്ചാണ് വെടിവെപ്പു നടന്നത്.
സംഭവത്തില് സ്കൂളിലെ അധ്യാപകർ പരാതി നല്കിയതിനെ തുടർന്ന് ബുധനാഴ്ച ആലപ്പുഴ സൗത്ത് പോലീസ് വെടിയേറ്റ വിദ്യാർത്ഥിയുടെ മൊഴിയെടുത്തു. തുടർന്ന് വെടിവെച്ച വിദ്യാർത്ഥിയുടെ വീട്ടില് പോലീസ് നടത്തിയ പരിശോധനയില് എയർഗണ്ണും കത്തിയും കണ്ടെടുത്തു.
വേറെ രണ്ടു വിദ്യാർത്ഥികളും സംഭവത്തില് ഉള്പ്പെട്ടിട്ടുണ്ട്. മൂന്നുപേർക്കും പ്രായപൂർത്തിയാകാത്തതിനാല് പോലീസ് ജുവനൈല് കോടതിക്കു റിപ്പോർട്ട് നല്കി. കുട്ടികള് ജുവനൈല് കോടതിയില് ഹാജരാകണം.
