കോട്ടയം: വെജിറ്റേറിയൻസിൻ്റെ പ്രിയപ്പെട്ട പനീർ ബട്ടർ മസാല തയ്യാറാക്കാം
ആവശ്യമായ ചേരുവകള്
പനീർ – 200 ഗ്രാം
പച്ചമുളക് – 2 എണ്ണം
സവാള- (ചെറുതായി അരിഞ്ഞത്) – അര കപ്പ്
തക്കാളി – (ചെറുതായി അരിഞ്ഞത്) – 2 എണ്ണം
ഇഞ്ചി-വെളുത്തുള്ളി പേസ്റ്റ് – 1 ടേബിള് സ്പൂണ്
മല്ലിപ്പൊടി – അര ടേബിള് സ്പൂണ്
ഗരം മസാല – അര ടീസ്പൂണ്
മഞ്ഞള് പൊടി – കാല് ടീസ്പൂണ്
കുരുമുളക് പൊടി – അര ടീസ്പൂണ്
മുളക് പൊടി – 1 ടീസ്പൂണ്
മല്ലിയില – ആവശ്യത്തിന്
ബട്ടർ – 6 ടേബിള് സ്പൂണ്
തേങ്ങയുടെ ഒന്നാം പാല് – 1 കപ്പ്
ചൂട് വെള്ളം – ആവശ്യത്തിന്
തയ്യാറാക്കുന്ന വിധം
പനീർ ചെറിയ ചതുര കഷ്ണങ്ങളായി മുറിക്കുക. ഒരു പാനില് 4 ടേബിള് സ്പൂണ് ബട്ടർ ചൂടാക്കി അതിലേക്ക് പനീർ ഇട്ട് ഇളം ബ്രൌണ് ആകുന്നതു വരെ വറുത്തെടുക്കുക. വറുക്കുമ്ബോള് കഷ്ണങ്ങള് തമ്മില് ഒട്ടിപ്പിടിക്കാതെ ശ്രദ്ധിക്കുക. ശേഷം ഇവ കോരി മാറ്റുക.
വീണ്ടും പാനിലേക്ക് കുറച്ച് ബട്ടർ കൂടി ചേർത്ത് കറിവേപ്പില, പച്ചമുളക്, ഇഞ്ചി-വെളുത്തുള്ളി പേസ്റ്റ്, സവാള എന്നിവ ചേർത്ത് വഴറ്റുക. ശേഷം തക്കാളി കൂടി ചേർത്ത് വഴറ്റിയതിലേക്ക് എല്ലാ മസാല പൊടികളും ചേർക്കുക. അല്പം മൂത്ത ശേഷം വറുത്ത പനീർ കഷ്ണങ്ങള് ചേർക്കാം. കഷ്ണങ്ങള് മുങ്ങിക്കിടക്കാൻ പാകത്തില് ചെറിയ ചൂടുവെള്ളം ഒഴിച്ചു ആവശ്യത്തിന് ഉപ്പ് കൂടി ചേർത്ത് 10 മിനിട്ടോളം വേവിക്കുക. ഇതിലേക്ക് തേങ്ങാപ്പാല് ഒഴിച്ച് നന്നായി കുറുകുന്നത് വരെ വേവിക്കുക. മല്ലിയില ഇട്ട ശേഷം അടുപ്പില് നിന്ന് ഇറക്കാവുന്നതാണ്.
