ഇന്ത്യയുടെ മൂവര്‍ണ്ണക്കൊടി ചന്ദ്രനില്‍ തൊട്ടതിന് പിന്നാലെ ചന്ദ്രനില്‍ സ്ഥലം വാങ്ങി ഇന്ത്യക്കാരന്‍;  ചന്ദ്രനിൽ എങ്ങനെ സ്ഥലം വാങ്ങാം?;  ചന്ദ്രനില്‍ സ്ഥലം വാങ്ങിയ ബോളിവുഡ് താരങ്ങൾ ആരെല്ലാം; അറിയേണ്ട കാര്യങ്ങൾ

സ്വന്തം ലേഖകൻ 

ഡല്‍ഹി: ചന്ദ്രയാന്‍ മൂന്ന് ചന്ദ്രോപരിതലത്തില്‍ ഇറങ്ങിയതിന് പിന്നാലെ ചന്ദ്രനില്‍ സ്ഥലം വാങ്ങി ഇന്ത്യക്കാരന്‍. ജമ്മു കശ്മീരില്‍ നിന്നുള്ള വ്യവസായിയും വിദ്യാഭ്യാസ വിദഗ്ധനുമായ രൂപേഷ് മാസനാണ് ചന്ദ്രനില്‍ സ്ഥലം വാങ്ങാനുള്ള കരാറിലേര്‍പ്പെട്ടത്. ജമ്മു കശ്മീരിലെയും ലേയിലെയും യുസിഎംഎഎസിന്റെ റീജ്യണല്‍ ഡയറക്ടറാണ് 49കാരനായ രൂപേഷ്. ചന്ദ്രനില്‍ സ്ഥലം വാങ്ങിയതിന്റെ രേഖകള്‍ ഇദ്ദേഹം മാധ്യമമായ ഹിന്ദുസ്ഥാന്‍ ടൈംസുമായി പങ്കിട്ടു.

ചന്ദ്രനില്‍ എങ്ങനെ സ്ഥലം വാങ്ങാം?

ചന്ദ്രനില്‍ സ്ഥലം സ്വന്തമാക്കുന്നതിനായി 1999-ല്‍ ഇന്റര്‍നാഷണല്‍ ലൂണാര്‍ ലാൻഡ്സ് രജിസ്ട്രി (ILLR) ആരംഭിച്ചു. ഇതുവഴിയാണ് സ്ഥലം വാങ്ങുക. വെബ്‌സൈറ്റിലെ വിവരം അനുസരിച്ച്‌ രൂപേഷ് മാസൻ സ്ഥലം വാങ്ങിയ ചന്ദ്രനിലെ പ്ലോട്ടിന്റെ നിലവിലെ നിരക്ക് ഏക്കറിന് 2,405 രൂപയാണ് (29.07 ഡോളര്‍). ലാക്കസ് ഫെലിസിറ്റാറ്റിസ്(സന്തോഷത്തിന്റെ തടാകം) എന്നറിയപ്പെടുന്ന ലൂണ എര്‍ത്ത്സ് മൂണ്‍, ട്രാക്റ്റ് 55-പാഴ്സല്‍ 10772-ലാണ് രൂപേഷ് മാസൻ സ്ഥലം വാങ്ങിയത്. മഴയുടെ കടല്‍, ബേ ഓഫ് റെയിൻബോസ് എന്നിങ്ങനെയുള്ള പേരുകളിലും ചന്ദ്രനില്‍ സ്ഥലങ്ങളുണ്ട്.

ഓഗസ്റ്റ് 25ന് രജിസ്‌ട്രേഷന്‍ പൂര്‍ത്തിയായതായും ഇദ്ദേഹം പറഞ്ഞു. ചന്ദ്രന്‍ ഭാവിയിലെ പ്രതീക്ഷയുടെ അടയാളമാണെന്ന് രൂപേഷ് പറഞ്ഞു. ചന്ദ്രനില്‍ സ്ഥലം വാങ്ങുന്നത് ഭാവിയിലേക്കുള്ള തയ്യാറെടുപ്പായിരിക്കുമെന്ന് രൂപേഷ് ചൂണ്ടിക്കാട്ടുന്നു. ചന്ദ്രനിലും മറ്റ് ഗ്രഹങ്ങളിലുമായി സെലിബ്രിറ്റികളും മുന്‍ യു.എസ് പ്രസിഡന്റുമാരുമടക്കം 675പേര്‍ സ്ഥലം വാങ്ങിയിട്ടുണ്ടെന്നും അദ്ദേഹം പറഞ്ഞു. ഓഗസ്റ്റ് 23നാണ് ചന്ദ്രനില്‍ ഇന്ത്യയുടെ ചന്ദ്രയാന്‍ മൂന്ന് സോഫ്റ്റ് ലാന്‍ഡിങ് നടത്തിയത്.

ഇന്ത്യൻ ബഹിരാകാശ ഗവേഷണ സ്ഥാപനത്തിന് കീഴില്‍ ചന്ദ്രനില്‍ നിങ്ങള്‍ക്ക് സ്ഥലം വാങ്ങണമെങ്കില്‍ ആദ്യം www.lunarregistry.com എന്ന വെബ്സൈറ്റ് സന്ദര്‍ശിക്കുക. ഇവിടെ ലാൻഡ് ലൂണാര്‍ പ്രോപ്പര്‍ട്ടി രജിസ്‌ട്രേഷനായി ഓണ്‍ലൈനായി അപേക്ഷിക്കാം. ചാന്ദ്ര സ്ഥലം രജിസ്ട്രേഷനായി താല്‍പ്പര്യമുള്ള എല്ലാ പൗരന്മാര്‍ക്കും ഓണ്‍ലൈനായി അപേക്ഷിക്കാം.

ചന്ദ്രനില്‍ സ്ഥലം വാങ്ങിയ ബോളിവുഡ് താരങ്ങള്‍

ചന്ദ്രനില്‍ സ്ഥലം വാങ്ങിയ ആദ്യ ബോളിവുഡ് താരമാണ് സുശാന്ത് സിംഗ് രജ്പുത് (എസ്‌എസ്‌ആര്‍). ‘സീ ഓഫ് മസ്‌കോവി’യുടെ മേരെ മസ്‌കോവിയൻസ് എന്ന് വിളിക്കപ്പെടുന്ന പ്രദേശത്ത് ചന്ദ്രന്റെ മറുവശത്ത് അദ്ദേഹം ഭൂമി വാങ്ങിയിരുന്നു. അന്തരിച്ച നടൻ ഇന്റര്‍നാഷണല്‍ ലൂണാര്‍ ലാൻഡ്സ് രജിസ്ട്രിയില്‍ നിന്നാണ് സ്വത്ത് വാങ്ങിയത്. 2018-ലാണ് സുശാന്ത് ചന്ദ്രനില്‍ ഭൂമി വാങ്ങിയത്.

ലൂണാര്‍ രജിസ്ട്രി പ്രകാരം, നടൻ ഷാരൂഖ് ഖാനും ചന്ദ്രനില്‍ സ്ഥലമുണ്ട്. സീ ഓഫ് ട്രാൻക്വിലിറ്റി എന്നറിയപ്പെടുന്ന ഇടത്താണ് ഷാരുഖിന് സ്ഥലം ഉള്ളത്. നടന്റെ ഒരു ഓസ്‌ട്രേലിയൻ ആരാധകനാണ് അദ്ദേഹത്തിനായി ചന്ദ്രനില്‍ സ്ഥലം വാങ്ങി നല്‍കിയത്. ഇക്കാര്യം ഷാരൂഖ് തന്നെ നേരത്തെ സ്ഥിരീകരിച്ചിട്ടുണ്ട്.

ബിഗ് ബോസ് പ്രണയ ജോഡികളായ പ്രിയങ്ക ചാഹര്‍ ചൗധരിയും അങ്കിത് ഗുപ്തയും ചന്ദ്രനില്‍ സ്ഥലം വാങ്ങിയവരാണ്. ആരാധകരാണ് താരങ്ങള്‍ക്ക് ചന്ദ്രനില്‍ സ്ഥലം വാങ്ങി നല്‍കിയത്. അംഗീകൃത ലൂണാര്‍ ചാര്‍ട്ടിന്റെ അങ്ങേയറ്റത്തെ വടക്കുപടിഞ്ഞാറൻ കോണില്‍ കൃത്യമായി 6 ചതുരങ്ങള്‍ തെക്കും 6 ചതുരങ്ങള്‍ കിഴക്കും സ്ഥിതി ചെയ്യുന്ന ഇടത്താണ് ഇവര്‍ക്ക് സ്ഥലം ലഭിച്ചിരിക്കുന്നത്.