കോട്ടയം: മുൻ മുഖ്യമന്ത്രി ഉമ്മൻചാണ്ടിയുടെ ഒന്നാം ചരമവാർഷികാചരണം ജൂലൈ 18ന് പുതുപ്പള്ളിയില് നടക്കും. ഉമ്മൻചാണ്ടി ഫൗണ്ടേഷൻ നടത്തുന്ന പരിപാടി രാവിലെ 11ന് പുതുപ്പള്ളി സെന്റ് ജോർജ് ഓർത്തഡോക്സ് വലിയപള്ളി പാരീഷ് ഹാളില് ഗവർണർ ആരിഫ് മുഹമ്മദ് ഖാൻ ഉദ്ഘാടനംചെയ്യും.
പുതുപ്പള്ളി നിയോജക മണ്ഡലത്തിലെ ആയിരത്തിലധികം കുട്ടികള്ക്കുള്ള വിദ്യാഭ്യാസ സഹായവിതരണം, വിവിധ ജീവകാരുണ്യ പ്രവർത്തനങ്ങള് തുടങ്ങിയവ ദിനാചരണത്തിന്റെ ഭാഗമായി നടക്കും. ജൂലായ് 14ന് പുതുപ്പള്ളിയിലെ ജനങ്ങള്ക്കായി ഒരുലക്ഷം രൂപയുടെ ഉമ്മൻചാണ്ടി ചികിത്സാ സഹായപദ്ധതി ഉദ്ഘാടനം ചെയ്യും.
ജൂലൈ 15ന് തിരുവനന്തപുരത്ത് ഉമ്മൻചാണ്ടി ലീഡർഷിപ്പ് സമ്മിറ്റ്, 16ന് കന്യാകുമാരിയില് ഒരു കുടുംബത്തിന് നിർമിച്ച വീടിന്റെ താക്കോല്ദാനം, 17ന് തിരുവനന്തപുരത്ത് ചിത്രപ്രദർശനം. 18ന് കോട്ടയം മാമ്മൻമാപ്പിള ഹാളില് ഉമ്മൻചാണ്ടി ഫൗണ്ടേഷൻ ഉദ്ഘാടനം, ഉന്നതവിജയം നേടിയവർക്കുള്ള എക്സലൻസ് അവാർഡ് വിതരണം, എന്നിവ നടക്കും.
ജൂലാ 20ന് തിരുവനന്തപുരത്ത് മെഡിക്കല് ക്യാമ്പ്, ജൂലാ 21ന് ബാഡ്മിന്റണ്-ക്രിക്കറ്റ് ടൂർണമെന്റുകള് തുടങ്ങിയവയുണ്ടാകും. സംഘാടകസമിതി ചെയർമാനായി തമ്പാനൂർ രവി, ശിവദാസൻ നായർ, ജോഷി ഫിലിപ്പ്, ജോസഫ് എം.പുതുശ്ശേരി, രാധാ വി.നായർ എന്നിവരെയും പ്രഥമ ഉമ്മൻചാണ്ടി അവാർഡ് ജൂറി പാനല് ചെയർമാനായി ഡോ. ശശി തരൂർ എം.പി.യെയും തിരഞ്ഞെടുത്തു.
‘അപ്പയുടെ ആഗ്രഹങ്ങള് സാർഥകമാക്കുകയാണ് ഉമ്മൻചാണ്ടി ഫൗണ്ടേഷന്റെ ലക്ഷ്യം. ജനങ്ങളോടൊപ്പമായിരിക്കുക, അവരുടെ പ്രശന്ങ്ങളില് തുണയാകുക എന്നതായിരുന്നു അപ്പയുടെ ജീവിതമന്ത്രം’ എന്ന് ചാണ്ടി ഉമ്മൻ എം.എല്.എ പറഞ്ഞു.
