വർക്കല : രാസലഹരിയുമായി യുവാവ് അറസ്റ്റില്. ഇയാളിൽ നിന്ന് 10.07 ഗ്രാം എം.ഡി.എം.എ പിടിച്ചെടുത്തു. ജില്ല ലഹരിവിരുദ്ധ സ്ക്വാഡിന്റെ പരിശോധനയിലാണ് യുവാവ് പിടിയിലായത്.
വർക്കല ചെറുന്നിയൂർ ശാസ്താൻനടക്ഷേത്രത്തിനുസമീപം താമസിക്കുന്ന മനു എന്ന മുകേഷിനെയാണ് (36) വീട്ടില്നടത്തിയ പരിശോധനയില് വില്പനക്കായി സൂക്ഷിച്ചിരുന്ന രാസലഹരിയുമായി അറസ്റ്റ് ചെയ്തത്.
സ്കൂള്-കോളജ് വിദ്യാർഥികള്ക്ക് സ്ഥിരമായി എം.ഡി.എം.എയും കഞ്ചാവ് തുടങ്ങിയ മാരക മയക്കു മരുന്നുകളും വില്പന നടത്തിവന്നിരുന്ന ഇയാളെ റൂറല് ഡാൻസാഫ് ടീം നിരീക്ഷിച്ചുവരുകയായിരുന്നു.
രഹസ്യവിവരത്തിന്റെ അടിസ്ഥാനത്തില് നാർകോട്ടിക് സെല് ഡിവൈ.എസ്.പി പ്രദീപ്, വർക്കല എ.എസ്.പി ദീപക് ധൻകർ എന്നിവരുടെ നിർദേശാനുസരണം വർക്കല ഇൻസ്പെക്ടർ ജെ.എസ്. പ്രവീണിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
