ആലുവ: ആലുവയില് മുട്ട കയറ്റി വന്ന ലോറിയില് സ്വകാര്യ ബസ് ഇടിച്ച് പതിനായിരക്കണക്കിന് മുട്ടകള് പൊട്ടി റോഡില് പരന്നു.
ലോറി അടുത്തുള്ള വർക്ക്ഷോപ്പിലേക്ക് പാഞ്ഞുകയറി രണ്ടു കാറുകളിലും ഇടിച്ച ശേഷമാണ് നിന്നത്. അപകടത്തില് ആളപായമില്ല.
ചൊവ്വാഴ്ച്ച രാവിലെ ഒൻപത് മണിയോടുകൂടിയാണ് ആലുവ പെരുമ്പാവൂർ റോഡില് അപകടമുണ്ടായത്. ക്രിസ്മസ് വിപണി കണക്കിലെടുത്ത് വ്യാപാര സ്ഥാപനങ്ങളിലേക്ക് മുട്ട കയറ്റി കൊണ്ടുവന്ന പിക്കപ്പ് ലോറിയാണ് അപകടത്തില് പെട്ടത്.
സ്വകാര്യ ബസ് ലോറിക്ക് പുറകില് വന്നിടിക്കുകയായിരുന്നു. ലോറിയിലുണ്ടായിരുന്ന ഇരുപതിനായിരത്തോളം മുട്ടകള് പൊട്ടി നശിച്ചു. അഗ്നിശമന സേന സ്ഥലത്തെത്തി ശുചീകരണ പ്രവർത്തനങ്ങള് നടത്തി റോഡ് ഗതാഗത യോഗ്യമാക്കി.
