സ്വന്തം ലേഖകൻ
കൊച്ചി : ഓസ്ലര് എന്ന പുതിയ ചിത്രത്തിന്റെ ട്രെയ്ലര് ലോഞ്ചിന് വേണ്ടി മാറ്റി വച്ച പണമാണ് ജയറാം കുട്ടികള്ക്ക് വേണ്ടി നല്കുന്നത്.ഇന്ന് ജയറാം കുട്ടികളുടെ വീട്ടില് നേരിട്ടെത്തി പണം കൈമാറും. കിഴക്കേപ്പറമ്ബില് മാത്യു, ജോര്ജ് എന്നിവര് അരുമയായി വളര്ത്തിയിരുന്ന 13 കന്നുകാലികളാണ് ഒറ്റദിവസംകൊണ്ട് കുഴഞ്ഞു വീണുചത്തത്. ഇതില് കറവയുണ്ടായിരുന്ന അഞ്ച് പശുക്കളും ഉള്പ്പെടും. ഇതോടെ കര്ഷക കുടുംബത്തിന്റെ വരുമാനം നിലച്ചു. പത്ത് ലക്ഷത്തോളം രൂപയുടെ നഷ്ടമാണ് പ്രാഥമികമായി കണക്കാക്കുന്നത്.
”കാലിത്തൊഴുത്ത് കൊണ്ടു നടക്കുന്ന ആളാണ് ഞാനും. 2005 ലും 2012 ലും കേരള സര്ക്കാറിന്റെ ക്ഷീരകര്ഷകനുള്ള പുരസ്കാരം എനിക്ക് ലഭിച്ചിട്ടുണ്ട്. ഷൂട്ടിങ് ഇല്ലാത്ത സമയത്ത് ഫാമിലാണ് ഞാൻ ഭൂരിഭാഗ സമയവും ചെലവഴിക്കാറുള്ളത്. ആറേഴ് വര്ഷം മുൻപ് ഈ കുഞ്ഞുങ്ങള്ക്കുണ്ടായ സമാന അനുഭവം എനിക്കും ഉണ്ടായിട്ടുണ്ട്. എന്റെ 24 പശുക്കളാണ് ഒരു ദിവസം ഏതാനും സമയത്തിനുള്ളില് ചത്തു പോയത്. നിലത്തിരുന്ന് കരയാനേ സാധിച്ചുള്ളൂ. വിഷബാധയാണ് മരണ കാരണം എന്നാണ് ഡോക്ടര്മാര് പറഞ്ഞത്. പക്ഷേ എങ്ങനെയാണെന്നറിയില്ല.
കുട്ടികളെ നേരില് കണ്ട് ആശ്വസിപ്പിക്കണം എന്നത് മാത്രമാണ് ലക്ഷ്യം. കേരള ഫീഡ്സിന്റെ ബ്രാൻഡ് അമ്ബാസിഡര് കൂടിയാണ്. കേരള സര്ക്കാറിനെ പ്രതിനിധീകരിച്ച് കാലിവളര്ത്തുമായി ബന്ധപ്പെട്ട ധാരാളം ക്ലാസുകളൊക്കെ എടുത്തിട്ടുണ്ട്. മന്ത്രി ചിഞ്ചുറാണിയെല്ലാം നല്ല പിന്തുണയാണ് നല്കുന്നത്”- ജയറാം പറഞ്ഞു
ഞായറാഴ്ച വൈകീട്ട് തീറ്റയായി നല്കിയ കപ്പത്തൊലിയില് നിന്ന് വിഷബാധയേറ്റാണ് പശുക്കളെല്ലാം ചത്തതെന്നാണ് മൃഗസംരക്ഷണ വകുപ്പിന്റെ കണ്ടെത്തല്.
