മാനന്തവാടി: മകന്റെ കടയില് കഞ്ചാവുകൊണ്ടുവെച്ച പിതാവ് അറസ്റ്റില്.
വൈരാഗ്യത്തിന്റെ പേരില് മകനെ കുടുക്കാൻ വേണ്ടിയാണ് മറ്റുള്ളവരുടെ സഹായത്തോടെ മാനന്തവാടി ചെറ്റപ്പാലം പുത്തൻതറ വീട്ടില് പി. അബൂബക്കർ (67) മകന്റെ കടയില് കഞ്ചാവ് വച്ചത്. മാനന്തവാടി എക്സൈസ് സർക്കിള് ഇൻസ്പെക്ടർ സജിത്ത് ചന്ദ്രൻ ആണ് പ്രതിയെ അറസ്റ്റുചെയ്തത്.
കേസിനാസ്പദമായ സംഭവം നടന്നത് കഴിഞ്ഞ സെപ്റ്റംബർ ആറിന് ഉച്ചയ്ക്കായിരുന്നു.
മാനന്തവാടി-മൈസൂരു റോഡില് അബൂബക്കറിന്റെ മകൻ നൗഫല് നടത്തുന്ന പി.എ. ബനാന എന്ന സ്ഥാപനത്തിലാണ് മറ്റുള്ളവരുടെ സഹായത്തോടെ അബൂബക്കർ കഞ്ചാവ് എത്തിച്ചത്.
വെള്ളിയാഴ്ച ഉച്ചയ്ക്ക് നൗഫല് പള്ളിയില് നിസ്കരിക്കാൻ പോയിരുന്ന സമയത്താണ് കടയില് കഞ്ചാവ് കൊണ്ടുവെച്ചത്. കടയില് കഞ്ചാവുണ്ടെന്ന രഹസ്യവിവരം എക്സൈസിനു നല്കിയതും അബൂബക്കർ തന്നെയാണ്.
