കോട്ടയം: വിരുദ്ധാഹാരങ്ങള് കഴിക്കരുതെന്ന് നമ്മള് പണ്ട് മുതലേ കേള്ക്കാറുണ്ട്.
ചേരാൻ പാടില്ലാത്ത ചില ആഹാരങ്ങള് ചേരുമ്പോള് അത് വിരുദ്ധാഹാരമാകുകയും നമ്മുടെ ശരീരത്തില് പ്രതികൂലമായി ബാധിക്കുകയും ചെയ്യും. നമ്മള് ചെറുപ്പം മുതല്ക്കേ കേള്ക്കുന്ന ഒന്നാണ് പാലുല്പന്നങ്ങളും മീനും ഒരുമിച്ച് കഴിക്കരുതെന്ന്. മീനും പാലും ഒരുമിച്ച് കഴിച്ചാല് ചർമരോഗമായ വെള്ളപ്പാണ്ട് വരും എന്ന് പറയാറുണ്ട്. ഇങ്ങനെ പറയുന്നതിന്റെ പിന്നിലുള്ള വാസ്തവമെന്താണെന്ന് ചിന്തിച്ചിട്ടുണ്ടോ?
തെക്കൻ ഏഷ്യയിലും മധ്യ കിഴക്കും ആണ് ആയുർവേദ പാരമ്പര്യം പറയുന്നതുപോലെ വിരുദ്ധാഹാരങ്ങള് ദോഷകരമാണ് എന്ന വിശ്വാസം നിലവിലുള്ളത്. ചില ഭക്ഷണങ്ങള് ഒരുമിച്ചു കഴിക്കുമ്പോള് അത് ശരീരത്തിന്റെ സന്തുലനം നഷ്ടപ്പെടുത്തും എന്ന് പലരും കരുതുന്നു. ഉഷ്ണപ്രകൃതിയായ മത്സ്യത്തോടൊപ്പം ശീതപ്രകൃതിയായ പാലുല്പന്നങ്ങള് കഴിക്കുന്നത് വിഷാംശം ഉണ്ടാകാനും വെള്ളപ്പാണ്ട് പോലുള്ള ചർമ രോഗങ്ങള്ക്കും കാരണമാകും എന്ന് ചിലർ വിശ്വസിക്കുന്നു.
പാലുല്പന്നങ്ങളും മത്സ്യവും ഒരുമിച്ച് കഴിക്കുന്നത് വെള്ളപ്പാണ്ടിനോ മറ്റേതെങ്കിലും ചർമരോഗങ്ങള്ക്കോ കാരണമാകും എന്നതിന് ശാസ്ത്രീയമായ ഒരു തെളിവും ഇല്ല. ശരീരത്തിലെ രോഗപ്രതിരോധസംവിധാനത്തെ മെലാനോസൈറ്റുകള് എന്ന പിഗ്മെന്റ് കോശങ്ങള് അബദ്ധത്തില് ആക്രമിക്കുന്നതു വഴി ഉണ്ടാകുന്ന ഒരു ഓട്ടോ ഇമ്മ്യൂണ് രോഗമാണ് വെള്ളപ്പാണ്ട്. ഇതിന് ജനിതകമോ പാരിസ്ഥിതികമോ, ഓട്ടോ ഇമ്മ്യൂണ് കാരണങ്ങളോ ഉണ്ടാകാം.
അതായത് പാലും മത്സ്യവും ഒരുമിച്ച് കഴിച്ചാല് വെള്ളപ്പാണ്ട് വരില്ല.
ഈ ഭക്ഷണ കോമ്പിനേഷൻ ഇത്തരത്തില് ഡീ പിഗ്മെന്റേഷന് ഡിസോർഡറുകള്ക്ക് കാരണമാകും എന്ന് തെളിയിക്കുന്ന ഒരു ക്ലിനിക്കല് പഠനവിവരണങ്ങളും ലഭ്യമല്ല. സ്കാൻഡിനേവിയൻ, മെഡിറ്ററേനിയൻ ഭക്ഷണരീതികളുള്പ്പെടെ ലോകത്തെ മിക്ക ഭക്ഷണരീതികളിലും പാലും മത്സ്യവും ഒരുമിച്ചു വരുന്നുമുണ്ട്. ഇത് വിരുദ്ധാഹാരമായിരുന്നെങ്കില് ലോകവ്യാപകമായി ആളുകള്ക്ക് ഈ ചർമപ്രശ്നം ഉണ്ടാകുമായിരുന്നു.
ഒരു പ്രശ്നം ഉള്ളത് ചിലർക്ക് പാലും മത്സ്യവും ഒരുമിച്ച് കഴിക്കുന്നത് ദഹനപ്രശ്നങ്ങള്ക്ക് കാരണമാകും എന്നതാണ്. പാലും മീനും ഒരുമിച്ച് കഴിക്കുന്നത് ചിലർക്ക് വയറു വീർക്കാനും അസ്വസ്ഥതയ്ക്കും കാരണമാകും. ലാക്ടോസ് ഇന്ടോളറൻസ് ഉള്ളവർക്കാണ് ഇത്തരത്തില് പ്രശ്നങ്ങള് ഉണ്ടാകാറുള്ളത്. അതായത് ടെന്ഷനടിക്കാതെ പാലുല്പന്നങ്ങളും മത്സ്യവും ഒരുമിച്ച് കഴിച്ചോളൂ. ചർമത്തിന് യാതൊരു ആരോഗ്യപ്രശ്നങ്ങളും ഉണ്ടാകില്ലെന്ന് ശാസ്ത്രം പറയുന്നു.
