കോട്ടയം: നോമ്പ് തുറക്കാൻ ഒരു മലബാർ സ്പെഷ്യല് സ്നാക്ക്സ് റെസിപ്പി നോക്കിയാലോ? വളരെ എളുപ്പത്തില് രുചികരമായി തയ്യാറാക്കാവുന്ന ബീഫ് പത്തിരിയുടെ റെസിപ്പി നോക്കാം.
ആവശ്യമായ ചേരുവകള്
ബീഫ് – അര കിലോ
സവാള – 2 എണ്ണം
പച്ചമുളക് – 4 എണ്ണം
ഇഞ്ചി, വെളുത്തുള്ളി ചതച്ചത് – അര ടീ സ്പൂണ്
മഞ്ഞള് പൊടി -അര ടീ സ്പൂണ്
മുളക് പൊടി – 1 ടീ സ്പൂണ്
ഗരം മസാല പൊടി – 1 ടീ സ്പൂണ്
കുരുമുളക് പൊടി – അര ടീ സ്പൂണ്
മല്ലി ഇല അരിഞ്ഞത് – കാല് കപ്പ്
കറിവേപ്പില – 1 തണ്ട്
വെളിച്ചെണ്ണ – ആവശ്യത്തിന്
ഉപ്പ് – ആവശ്യത്തിന്
മുട്ട – 2 എണ്ണം
മൈദ – 1 കപ്പ്
ഓയില് – ആവശ്യത്തിന്
പഞ്ചസാര – 2 ടീ സ്പൂണ്
തയാറാക്കുന്ന വിധം
ബീഫ് നന്നായി കഴുകി വൃത്തിയാക്കി മഞ്ഞള്പൊടി, കുരുമുളക്പൊടി, ഉപ്പ് , മുളക് പൊടി, ഗരം മസാല എന്നിവ ചേര്ത്ത് വേവിക്കുക. ശേഷം മിക്സിയില് ഇട്ട് ഒന്ന് കറക്കി എടുക്കുക. ഒരു പാനില് വെളിച്ചെണ്ണ ഒഴിച്ച് ചൂടാക്കി ഇഞ്ചി, വെളുത്തുള്ളി ചതച്ചത് വഴറ്റുക. സവാള, പച്ചമുളക് ചേർത്ത് വഴറ്റുക. ഇതിലേക്ക് ബാക്കി ഉള്ള മഞ്ഞള് പൊടി, മുളക് പൊടി, കുരുമുളക് പൊടി, ഗരംമസാല, ഉപ്പ്, മല്ലിയില, കറിവേപ്പില എന്നിവയും ചേര്ത്ത് നന്നായി വഴറ്റിയെടുക്കുക. വേവിച്ചു വെച്ച ബീഫ് ചേര്ത്ത് യോജിപ്പിക്കുക. മൈദയും ഉപ്പും കുറച്ച് വെള്ളവും ചേര്ത്ത് ചപ്പാത്തി മാവ് പോലെ കുഴച്ചെടുക്കുക.
ചെറിയ ഉരുളകള് ആക്കി പൂരിയുടെ വലുപ്പത്തില് പരത്തുക. ഒരു പൂരി എടുത്തു അതിന്റെ നടുവില് കുറച്ചു ബീഫ് മസാല വെക്കുക. മുകളില് ഒരു പൂരി കൂടി വെച്ച് സൈഡ് നന്നായി ഒട്ടിച്ച് മടക്കി എടുക്കുക. ശേഷം ചൂടായ എണ്ണയില് ഇട്ട് വറുത്തെടുക്കുക. ഒരു പാത്രത്തില് മുട്ടയും, ലേശം പഞ്ചസാരയും ചേര്ത്ത് നന്നായി ബീറ്റ് ചെയ്യുക. ഒരു പാനില് 1 ടീ സ്പൂണ് നെയ്യ് അല്ലെങ്കില് എണ്ണ ഒഴിക്കുക. വറുത്തു വെച്ചിരിക്കുന്ന ഓരോ ഇറച്ചി പത്തിരി മുട്ടയില് മുക്കി ഒന്നുകൂടി തവയില് ഇട്ട് മൂപ്പിച്ച് എടുക്കുക.
