സ്വകാര്യ വ്യക്തിയുടെ പറമ്പിലെ മരത്തില് നിന്ന് നാരങ്ങ പറിച്ചതിന് 12 വയസുകാരനെ ആള്ക്കൂട്ടം മര്ദിച്ച് കൊലപ്പെടുത്തി. ബിഹാറിലെ നളന്ദയിലാണ് സംഭവം. വീടിന് സമീപം കളിച്ചു കൊണ്ടിരുന്ന കുട്ടി അയല്പക്കത്തെ മരത്തില് നിന്നും നാരങ്ങ പറിച്ചതാണ് പ്രകോപനത്തിന് കാരണം. സംഭവത്തില് 12 പേര് അറസ്റ്റിലായി. അനുവാദമില്ലാതെ നാരങ്ങ പറിച്ചു എന്നാരോപിച്ച് വീട്ടുടമയും പന്ത്രണ്ടോളം വരുന്ന സംഘവും കുട്ടിയെ മര്ദിക്കുകയായിരുന്നു. ക്രൂരമായ മര്ദനമേറ്റ കുട്ടി സംഭവസ്ഥലത്ത് വെച്ച് തന്നെ മരിച്ചു.
പിന്നാലെ വിവരമറിഞ്ഞെത്തിയ നാട്ടുകാര് സ്ഥലത്ത് വലിയ പ്രതിഷേധം ഉയര്ത്തി. മൃതദേഹവുമായി നാട്ടുകാര് റോഡ് ഉപരോധിച്ചു. പ്രതിഷേധം ശക്തമായതോടെ ജില്ലാ പോലീസ് മേധാവിയുടെ നേതൃത്വത്തില് വന് പോലീസ് സന്നാഹം സ്ഥലത്തെത്തി. പ്രതിഷേധക്കാരുമായി സംസാരിച്ച പോലീസ് കുറ്റക്കാര്ക്കെതിരെ കര്ശന നടപടി സ്വീകരിക്കുമെന്ന് ഉറപ്പ് നല്കി. നിലവില് 12 പോലീസ് സ്റ്റേഷനുകളില് നിന്നുള്ള ഉദ്യോഗസ്ഥരെ പ്രദേശത്ത് സുരക്ഷയ്ക്കായി വിന്യസിച്ചിട്ടുണ്ട്. കേസിലെ പ്രധാന പ്രതിയടക്കം 12 പേരെ പോലീസ് ഇതിനോടകം കസ്റ്റഡിയിലെടുത്തിട്ടുണ്ട്. സംഭവത്തില് വിശദമായ അന്വേഷണം ആരംഭിച്ചതായും നിയമ നടപടികള് വേഗത്തിലാക്കുമെന്നും പോലീസ് വ്യക്തമാക്കി.
