കുറവിലങ്ങാട്: ഉഴവൂർ ബ്ലോക്ക് പഞ്ചായത്തിലൂടെ കടന്നു പോകുന്ന എംസി റോഡിന്റെ ഇരുവശങ്ങളും സൗന്ദര്യവൽക്കരിക്കുന്നു. മാലിന്യമുക്ത നവകേരളം ജനകീയ പ്രചാരണ പരിപാടിയുടെ ഭാഗമായി പ്രധാനപ്പെട്ട കേന്ദ്രങ്ങൾ സൗന്ദര്യവൽക്കരിക്കുന്നതിന്റെ ഭാഗമായാണ് പദ്ധതി.
റോഡിനു ഇരുവശവും 20 കിലോമീറ്റർ നീളത്തിലാണ് മനോഹരമാക്കുന്നത്. പാത കടന്നു പോകുന്ന കാണക്കാരി, കുറവിലങ്ങാട്, മരങ്ങാട്ടുപിള്ളി, ഉഴവൂർ, വെളിയന്നൂർ എന്നീ പഞ്ചായത്ത് പ്രദേശങ്ങൾ സൗന്ദര്യവൽക്കരിക്കും. രണ്ടു ഘട്ടങ്ങളിലായി 15 ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. വിവിധ സ്ഥാപനങ്ങളുടെ സിഎസ്ആർ ഫണ്ട് വഴി ഹരിതകേരളം മിഷനാണ് ഏകോപന ചുമതല.
ആദ്യ ഘട്ടത്തിൽ പ്രധാന നഗരങ്ങൾ, പൊതുഇടങ്ങൾ ,വിദ്യാഭ്യാസ സ്ഥാപനങ്ങൾ, കാത്തിരിപ്പു കേന്ദ്രങ്ങൾ എന്നിവയുടെ സമീപ സ്ഥലങ്ങൾ സൗന്ദര്യവൽക്കരിക്കും. രണ്ടാം ഘട്ടത്തിൽ എംസി റോഡിന്റെ മുഴുവൻ പ്രദേശങ്ങളിലേക്കും പദ്ധതി വ്യാപിപ്പിക്കും. എംസി റോഡ് കടന്നു പോകാത്ത മാഞ്ഞൂർ, കടപ്ലാമറ്റം, രാമപുരം പഞ്ചായത്തുകളിലും സമാന്തരമായ പ്രവർത്തനം നടക്കും.
ഓട്ടോറിക്ഷ തൊഴിലാളികൾ, ചുമട്ടു തൊഴിലാളികൾ, വ്യാപാരി വ്യവസായികൾ, റസിഡന്റ്സ് അസോസിയേഷനുകൾ, പ്രദേശവാസികൾ തുടങ്ങിയവർക്കാണ് പരിപാലന ചുമതല. മാലിന്യമുക്തം നവകേരളം ജനകീയ പ്രചാരണം മാർച്ച് 30ന് അവസാനിക്കും.
ഉഴവൂർ ബ്ലോക്ക് പഞ്ചായത്ത് പ്രസിഡന്റ് രാജു ജോണിന്റെ അധ്യക്ഷതയിൽ ചേർന്ന യോഗത്തിലാണ് തീരുമാനം. ഹരിത കേരളം മിഷൻ ജില്ലാ കോ-ഓർഡിനേറ്റർ ഇൻ ചാർജ് എസ്. ഐസക് പദ്ധതി വിശദീകരിച്ചു. പഞ്ചായത്ത് പ്രസിഡന്റുമാർ, പഞ്ചായത്ത് അംഗങ്ങൾ, ഉദ്യോഗസ്ഥർ എന്നിവർ പങ്കെടുത്തു.
