കൊച്ചി : മകൻ സായിയുടെ പിറന്നാള് ആഘോഷമാക്കി നവ്യ നായരും കുടുംബവും. കൊച്ചിയിലെ സ്വകാര്യ റിസോര്ട്ടില് നടന്ന പിറന്നാള് ആഘോഷത്തില് നവ്യയുടെ കുടുംബാംഗങ്ങളും സായിയുടെ അടുത്ത സുഹൃത്തുക്കളും പങ്കെടുത്തു.
പിറന്നാള് ആഘോഷത്തിന്റെ ചിത്രങ്ങളും വിഡിയോയുമെല്ലാം നവ്യ സമൂഹമാധ്യമത്തിലൂടെ പങ്കുവച്ചിട്ടുണ്ട്.സായിക്ക് ഇഷ്ടപ്പെട്ട ഫുട്ബോള് തീമിലാണ് ഇത്തവണയും പിറന്നാള് കേക്ക് ഒരുക്കിയത്. മെസിയാണ് സായിയുടെ ഇഷ്ട ഫുട്ബോള് താരം. സായിയുടെ ഡ്രസ്സിന് മാച്ചാകുന്ന രീതിയില് ആയിരുന്നു സന്തോഷിന്റെയും നവ്യയുടെയും വേഷം.
”എല്ലാവരും വിചാരിക്കും സായ് ഒരു കുസൃതിക്കുട്ടിയായിരുന്നുവെന്ന്. അവനൊരു പാവം കുട്ടിയാണ്. കുരുത്തക്കേടുകളാണെങ്കിലും ഒരു സ്ഥലത്തുനിന്ന് അടങ്ങി ഒതുങ്ങിയെ ചെയ്യൂ. ഞാൻ തോളത്തു തട്ടി ഉറക്കിയിരുന്ന ചെക്കൻ ഇപ്പോള് എന്നെ തോളത്തു തട്ടി ഉറക്കുന്ന അത്രയും വളര്ന്നു, അതിശയം തോന്നുന്നു. അവനൊരു ടീനേജര് ആകുകയാണ്. സഹതാപം നിറഞ്ഞ മനുഷ്യനായി വളരണം. ഒരാളുടെ വിഷമം കണ്ടാല് മനസ്സിലാക്കാനും അവനാല് കഴിയുന്ന സഹായം അവര്ക്ക് ചെയ്യുവാനും തോന്നണം. ഇതാണ് ഈ പിറന്നാളിന് എനിക്ക് അവനോടു പറയുവാനുള്ളത്.”-നവ്യ നായർ പറഞ്ഞു.
വി.കെ. പ്രകാശ് സംവിധാനം ചെയ്ത ‘ഒരുത്തീ’ എന്ന ചിത്രത്തിലൂടെ നവ്യ നായര് അഭിനയ രംഗത്ത് തിരിച്ചെത്തിയിരുന്നു. അനീഷ് ഉപാസന സംവിധാനം ചെയ്ത ‘ജാനകി ജാനെ’യാണ് നവ്യുടേതായി ഏറ്റവുമൊടുവില് റിലീസ് ചെയ്ത ചിത്രം. റിയാലിറ്റി ഷോകളിലൂടെ മിനി സ്ക്രീനിലും സജീവമാണ് നടി.
