പമ്പ: ശബരിമല തീർത്ഥാടകർ സഞ്ചരിച്ച വാഹനം അപകടത്തിൽപ്പെട്ട് ഭക്തർക്ക് പരിക്ക്. പത്തനാപുരത്ത് നിന്നെത്തിയ തീർത്ഥാടകരുടെ കാറാണ് അപകടത്തിൽപ്പെട്ടത്. ഇലവുങ്കൽ ഭാഗത്ത് എത്തിയപ്പോഴായിരുന്നു അപകടം.
ഡ്രൈവർ ഉറങ്ങിപ്പോയതാകാമെന്നാണ് പ്രാഥമിക നിഗമനം. അശ്രദ്ധമായി വാഹനം ഓടിച്ചിട്ടുണ്ടോയെന്ന് പരിശോധിക്കുമെന്ന് പോലീസ് പറഞ്ഞു. കാറിലുണ്ടായിരുന്ന ഭക്തരെ നിലയ്ക്കൽ പിഎച്ച്സിയിൽ എത്തിച്ച് പ്രാഥമിക ചികിത്സ നൽകി.
തീർത്ഥാടകരുടെ പരിക്ക് ഗുരുതരമല്ലെന്നാണ് വിവരം. ശബരിമലയിലേക്കെത്തുന്ന തീർത്ഥാടകരുടെ വാഹനങ്ങൾ അപകടത്തിൽപ്പെടുന്നത് വർദ്ധിച്ചു വരുന്ന സാഹചര്യത്തിൽ നിർദേശങ്ങളുമായി മോട്ടോർവാഹന വകുപ്പ് രംഗത്തെത്തിയിരുന്നു.
കയറ്റങ്ങൾ ഇറങ്ങുന്ന സമയങ്ങളിൽ ഗിയർ ഡൗൺ ചെയ്ത് വാഹനം ഓടിക്കണമെന്നും അമിത വേഗത്തിൽ വാഹനം ഓടിക്കരുതെന്നും നിർദേശിച്ചു.
