തിരുവനന്തപുരം: വാട്സ്ആപ്പ് ഉപയോഗിക്കാത്തവരായി ചുരുക്കം ചിലർ മാത്രമേ ഉണ്ടാകൂ. നമ്മുടെ പ്രഫഷണല് ലൈഫും പേഴ്സണല് ലൈഫുമുള്പ്പെടെ ഇപ്പോള് വാട്സ്ആപ്പുമായി ബന്ധപ്പെട്ടിരിക്കുന്നു.
ചാറ്റിങും, കോളുകളും, ഫോട്ടോ വീഡിയോ പങ്കുവയ്ക്കലുകളുമുള്പ്പെടെ നിരവധി കാര്യങ്ങള് വാട്സ്ആപ്പ് വഴി ചെയ്യാൻ സാധിക്കും. എന്നാല് ഇപ്പോഴിതാ ഒരു കിടിലൻ ഫീച്ചറുകൂടി കൊണ്ടുവന്നിരിക്കുകയാണ് വാട്സ്ആപ്പ്. ഇനിമുതല് മറ്റ് ആപ്പുകളുടെ സഹായമില്ലാതെ വാട്സ്ആപ്പ് ഉപയോഗിച്ച് തന്നെ മൊബൈല് റീചാർജ് ചെയ്യാൻ പറ്റുമെന്നതാണ് ഫീച്ചർ. ‘പേയു’ എന്ന സംവിധാനവുമായി ബന്ധപ്പെടുത്തിയാണ് വാട്സ്ആപ്പ് പുതിയ ഫീച്ചർ കൊണ്ടുവരുന്നത്. ആൻഡ്രോയ്ഡ്, ഐഒഎസ് എന്നിവയില് ഫീച്ചറുകള് തൊട്ടടുത്ത ആഴ്ചകളില് തന്നെ എത്തുമെന്നാണ് വാട്സ്ആപ്പ് പറഞ്ഞിരിക്കുന്നത്.
സ്വന്തം നമ്പറിലേക്കോ മറ്റൊരാളുടെ നമ്പറിലേക്കോ ഇതുവഴി റീചാർജ് ചെയ്യാൻ സാധിക്കുമെന്നതും പ്രത്യേകതയാണ്. ജിയോ, എയർടെല്, വി ഉപഭോക്താക്കള്ക്കാണ് ആദ്യഘട്ടത്തില് ഈ റീചാര്ജ് സേവനം ഉപയോഗപ്പെടുത്താൻ കഴിയുക. വാട്സ്ആപ്പ് വഴി തന്നെ പണം അയക്കാനുള്ള സംവിധാനം നേരത്തെ തന്നെയുണ്ട്. ഇതിന് പുറമെയാണ് പുത്തന് ഫീച്ചര് അവതരിപ്പിച്ച് വാട്സ്ആപ്പ് അതിന്റെ സവിശേഷതകള് വര്ധിപ്പിച്ചത്.
വാട്സ്ആപ്പ് വഴി എങ്ങനെ മൊബൈല് റീചാർജ് ചെയ്യാം
വാട്സ്ആപ്പില് പ്രവേശിച്ച് രൂപയുടെ ചിഹ്നമുള്ള ഐക്കണില് ക്ലിക്ക് ചെയ്ത് അതില് പ്രീപെയ്ഡ് എന്ന ഓപ്ഷൻ തെരഞ്ഞെടുക്കുക. പിന്നീട് മൊബൈല് ഓപ്പറേറ്ററെ തെരഞ്ഞെടുക്കുകയും അതില് നിന്ന് പ്ലാൻ തെരഞ്ഞെടുക്കുകയും ചെയ്യുക. ശേഷം പെയ്മെന്റ് മോഡ് തെരഞ്ഞെടുത്ത് റീചാർജ് കംപ്ലീറ്റ് ചെയ്യാം.
