കല്പ്പറ്റ: വയനാട്ടില് കടുവയുടെ ആക്രമണത്തില് യുവാവ് കൊല്ലപ്പെട്ടു.
സുല്ത്താന് ബത്തേരി വാകേരി മൂടക്കൊല്ലി കൂടല്ലൂരിലാണ് സംഭവം.
പാതി ഭക്ഷിച്ച നിലയിലാണ് മൃതദേഹം കണ്ടെത്തിയത്. കടുവ ആക്രമിച്ചശേഷം മൃതദേഹം ഉപേക്ഷിച്ചതാണെന്നാണ് സൂചന.
വാകേരി കൂടല്ലൂര് മൂടക്കൊല്ലി സ്വദേശി മാരോട്ടിതടത്തില് പ്രജീഷ് (36) ആണ് മരിച്ചത്. പാടത്തിന് സമീപത്തായിരുന്നു മൃതദേഹം. ഇവിടെ കടുവയെ കണ്ടതായാണ് നാട്ടുകാര് പറയുന്നത്.
കാലിന്റെ ഭാഗം പൂര്ണമായും ഭക്ഷിച്ച നിലയിലാണ് മൃതദേഹം കണ്ടെത്തിയത്. സംഭവ സ്ഥലത്തേക്ക് വനംവകുപ്പ് ഉദ്യോഗസ്ഥര് തിരിച്ചിട്ടുണ്ട്. ജനവാസ മേഖലയിലാണ് സംഭവം.
പാടത്ത് പുല്ലരിയാന് പോയതായിരുന്നു പ്രജീഷ്. ഏറെ വൈകിയിട്ടും വീട്ടിലേക്ക് മടങ്ങിയെത്തിയില്ല. തുടര്ന്ന് സഹോദരന് അന്വേഷിച്ചു പോയപ്പോഴാണ് മൃതദേഹം കണ്ടെത്തിയത്.
വനാതിര്ത്തി മേഖലയാണ് മൂടക്കൊല്ലി. ഇവിടങ്ങളില് പലപ്പോഴായി കടുവ ഉള്പ്പെടെയുള്ള വന്യമൃഗങ്ങളുടെ സാന്നിധ്യമുണ്ട്. രണ്ടുമാസം മുമ്ബ് തോട്ടം തൊഴിലാളികള്ക്കുനേരെ കടുവയുടെ ആക്രമണ ശ്രമം ഉണ്ടായ സ്ഥലത്ത് തന്നെയാണ് ഒരാളെ കൊല്ലപ്പെട്ട നിലയില് കണ്ടെത്തിയത്.