തിരുവനന്തപുരം: 2026-27 അധ്യയനവർഷത്തെ പാഠപുസ്തകങ്ങള് തയ്യാർ, 79 ലക്ഷം പാഠപുസ്തകങ്ങളുടെ അച്ചടി പൂർത്തിയായെന്ന് മന്ത്രി വി ശിവൻകുട്ടി.
ഫെബ്രുവരി രണ്ടാം വാരത്തില് വിതരണം ആരംഭിക്കും. അടുത്ത അധ്യായന വർഷത്തിന് മൂന്നുമാസം മുമ്പാണ് പുസ്തകമെത്തുന്നത്. സൗജന്യ യൂണിഫോമും മൂന്നുമാസം മുമ്പ് വിതരണം ചെയ്യും. യൂണിഫോമിനുള്ള കേന്ദ്ര ഫണ്ട് ലഭ്യമായിട്ടില്ല.
എങ്കിലും സംസ്ഥാന സർക്കാർ യൂണിഫോം നല്കുമെന്നും മന്ത്രി വ്യക്തമാക്കി. അടുത്ത അധ്യയന വർഷം മുതല് പതിനൊന്നാം ക്ലാസിന് പുതിയ പാഠപുസ്തകം ലഭ്യമാക്കും. 15 വർഷത്തിനുശേഷമാണ് ഹയർ സെക്രട്ടറി തലത്തില് പാഠപുസ്തകം പരിഷ്കരിക്കുന്നത്. SCERT പാഠപുസ്തകങ്ങളാണ് പരിഷ്കരിച്ചത്. NCERT യുടെ പുസ്തകങ്ങള് പരിഷ്കരിക്കുന്നതിനെക്കുറിച്ച് ആലോചന പിന്നീടെന്നും മന്ത്രി ചൂണ്ടിക്കാട്ടി.
നേമം റെയില്വേ ടെർമിനല് പദ്ധതി കേന്ദ്രം അട്ടിമറിക്കുന്നു. പദ്ധതിയുടെ വലിപ്പം വെട്ടി കുറച്ചു. മാസ്റ്റർ പ്ലാൻ തകിടം മറിച്ചു. കേന്ദ്രത്തിന്റേത് ജനങ്ങളെ വഞ്ചിക്കുന്ന നിലപാടാണ്. നേമത്തെ സ്വയം പ്രഖ്യാപിത ബിജെപി സ്ഥാനാർഥി രാജീവ് ചന്ദ്രശേഖരൻ മറുപടി പറയണമെന്നും മന്ത്രി വി ശിവൻകുട്ടി ആവശ്യപ്പെട്ടു.
കവി സച്ചിതാനന്തന്റെ പ്രതികരണം, ജനാധിപത്യത്തിന്റെ പോരാട്ടങ്ങളെ ദുർബലപ്പെടുത്തുന്നത്. വലതുപക്ഷ രാഷ്ട്രീയത്തിന് കോടാലി കയ്യായി പ്രവർത്തിക്കുന്നതാണ് പ്രതികരണം. ഇന്ത്യയിലെ ഒരു സർക്കാരും ചെയ്യാത്ത കാര്യങ്ങളാണ് എല്ഡിഎഫ് സർക്കാർ ചെയ്യുന്നത്. ഇത് തിരിച്ചറിയാനുള്ള നിലപാട് സാംസ്കാരിക നായകരില് നിന്നും സമൂഹം പ്രതീക്ഷിക്കുന്നുവെന്നും മന്ത്രി കൂട്ടിച്ചേർത്തു.