കൊച്ചി: കലൂര് സ്റ്റേഡിയത്തിലെ ഗാലറിയില് നിന്ന് വീണ് ഗുരുതരമായി പരിക്കേറ്റ ഉമ തോമസ് എംഎല്എയുടെ ആരോഗ്യനിലയില് ചെറിയ പുരോഗതിയുള്ളതായി മകൻ.
തീവ്രപരിചരണ വിഭാഗത്തില് ചികിത്സയിലുള്ള ഉമ തോമസിനെ രാവിലെ മകൻ കണ്ടു. രാവിലെ കണ്ടപ്പോള് ‘അമ്മ കണ്ണു തുറന്നുവെന്നും കൈകാലുകള് അനക്കിയെന്നും മകൻ പറഞ്ഞു.
ഉമ തോമസിന്റെ ആരോഗ്യസ്ഥിതി സംബന്ധിച്ച ഏറ്റവും പുതിയ വിവരം ഇന്ന് രാവിലെ പത്തുമണിയോടെ മെഡിക്കല് ബോര്ഡ് നല്കും.
കണ്ണുകള് തുറന്നതും കൈകാലുകള് അനക്കിയതും ശുഭപ്രതീക്ഷ നല്കുന്നതാണ്. രാവിലെ 8.30ന് ഉമ തോമസ് എംഎല്എയെ ബ്രോഹ്കോസ്കോപ്പി ടെസ്റ്റിന് വിധേയമാക്കും.
ഇതുവരെ ഉമ തോമസിന്റെ ആരോഗ്യനില മാറ്റമില്ലാതെ തുടരുന്നുവെന്നായിരുന്നു ഇന്നലെ രാത്രിവരെ റിനൈ മെഡിസിറ്റിയിലെ മെഡിക്കല് സംഘം അറിയിച്ചിരുന്നത്.