കോഴിക്കോട്: കോഴിക്കോട് റെയില്വെ സ്റ്റേഷനില് ട്രെയിനില് നിന്ന് വീണുമരിച്ചയാളെ തള്ളിയിട്ടതെന്ന് സംശയം.
സംഭവത്തില് ഒരാളെ റെയില്വേ പൊലീസ് കസ്റ്റഡിയിലെടുത്തു.
യാത്രക്കാരില് ഒരാളുടെ മൊഴിയുടെ അടിസ്ഥാനത്തിലാണ് കസ്റ്റഡിയിലെടുത്തത്.
ഇയാളെ ചോദ്യം ചെയ്ത് വരികയാണെന്നു റെയില്വേ പൊലീസ് അറിയിച്ചു. ഇന്നലെ രാത്രി ട്രെയിനില് നിന്ന് വീണ് മരിച്ചയാളെ തിരിച്ചറിഞ്ഞിട്ടില്ല.
കോഴിക്കോട് റെയില്വേ സ്റ്റേഷനില് 11.30ന് എത്തിയ മംഗളൂരു-കൊച്ചുവേളി ട്രെയിനില് നിന്നാണ് യാത്രക്കാരന് വീണത്. എസി കമ്ബാർട്മെന്റിലെ ഡോറില് ഇരുന്ന ആളാണ് മരിച്ചത്.
സ്റ്റേഷനില് നിന്നും ട്രെയിൻ എടുത്ത ഉടനെയാണ് അപകടമുണ്ടായത്. യാത്രക്കാർ ചങ്ങല വലിച്ചാണ് ട്രെയിൻ നിർത്തിയത്. ട്രെയിനിനും പ്ലാറ്റ്ഫോമിനും ഇടയില് കുടുങ്ങുകയായിരുന്നു യാത്രക്കാരന്. ഉടന് തന്നെ സ്വകാര്യ ആശുപത്രിയില് എത്തിച്ചെങ്കിലും മരിച്ചിരുന്നു. മൃതദേഹം മെഡിക്കല് കോളേജ് മോർച്ചറിയിലേക്ക് മാറ്റി.