കോട്ടയം: നിരവധി ഗുണങ്ങളുള്ള ഒരു പച്ചക്കറിയാണ് തക്കാളി. വിറ്റാമിന് എ, വിറ്റാമിന് സി, കെ, ബി 6, ഫോളേറ്റ്, പൊട്ടാസ്യം, മാംഗനീസ്, മഗ്നീഷ്യം, ഫോസ്ഫറസ്, നാരുകള്, പ്രോട്ടീന്, ലൈക്കോപീന് എന്നിവ തക്കാളിയില് അടങ്ങിയിരിക്കുന്നു.
വിറ്റാമിൻ സിയുടെയും മറ്റ് ആന്റിഓക്സിഡന്റുകളുടെയും മികച്ച ഉറവിടമായ തക്കാളി ചര്മ്മത്തിന്റെ ആരോഗ്യത്തിന് ഏറെ നല്ലതാണ്. തക്കാളി കൊണ്ടുള്ള ഫേസ് പാക്കുകള് ചര്മ്മ സംരക്ഷണത്തിന് മികച്ചതാണ്. മുഖത്തെ കരുവാളിപ്പ്, കറുത്ത പാടുകള്, ചുളിവുകള്, ബ്ലാക്ക്ഹെഡ്സ് തുടങ്ങിയവയെ തടയാനും മുഖം തിളങ്ങാനും തക്കാളി കൊണ്ടുള്ള ഫേസ് പാക്കുകള് സഹായിക്കും.
തക്കാളി നാരങ്ങാനീര്
രണ്ട് ടേബിള്സ്പൂണ് തക്കാളി നീരിലേയ്ക്ക് ഒരു ടേബിള്സ്പൂണ് നാരങ്ങാനീര് ചേര്ത്ത് മിശ്രിതമാക്കാം. ശേഷം ഈ മിശ്രിതം മുഖത്ത് പുരട്ടാം. 20 മിനിറ്റിന് ശേഷം കഴുകി കളയാം. ഇങ്ങനെ ചെയ്യുന്നതും കരുവാളിപ്പ് അകറ്റാന് സഹായിക്കും.
തക്കാളിയും തൈരും
തക്കാളി തൊലി ഒരു ബൗളില് എടുക്കാം. അതിലേയ്ക്ക് ഒരു ടേബിള്സ്പൂണ് തൈര് ചേർത്ത് അരച്ചെടുക്കാം. ഈ മിശ്രിതം മുഖത്ത് പുരട്ടി അല്പ സമയം വിശ്രമിക്കാം. ശേഷം തണുത്ത വെള്ളത്തില് കഴുകി കളയാം.
തക്കാളി വെളിച്ചെണ്ണ
തക്കാളിയുടെ തൊലി വെയിലത്ത് വച്ച് ഉണക്കി പൊടിച്ചെടുക്കാം. അതിലേയ്ക്ക് കുറച്ച് വെളിച്ചെണ്ണ കൂടി ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടി മൃദുവായി മസാജ് ചെയ്യാം. പ്രകൃതി ദത്തവും ഗുണപ്രദവുമായ ഒരു സ്ക്രബാണിത്. മുഖത്ത് മാത്രമല്ല ടാൻ ഉണ്ടാകുന്ന ഇടങ്ങളിലും ഇത് ഉപയോഗിക്കാവുന്നതാണ്.
തക്കാളി ഉടച്ചെടുത്ത് നേരിട്ട് മുഖത്ത് പുരട്ടുന്നതും ഗുണപ്രദമാണ് | ചിത്രം: ഫ്രീപിക്
തക്കാളി മഞ്ഞള്പ്പൊടി
തക്കാളി അരച്ചതിലേയ്ക്ക് കുറച്ച് മഞ്ഞള്പ്പൊടിയും ചന്ദനപ്പൊടിയം ചേർത്ത് അരച്ചെടുക്കാം. ഈ മിശ്രിതം മുഖത്ത് പുരട്ടാം. ഉണങ്ങിയതിനു ശേഷം കഴുകി കളയാം
തക്കാളി തേൻ
തക്കാളി തൊലി കളഞ്ഞ് ഉടച്ചെടുത്തതിലേയ്ക്ക് തേൻ ചേർത്തിളക്കി യോജിപ്പിക്കാം. ഇത് മുഖത്ത് പുരട്ടി 10 മിനിറ്റിനു ശേഷം തണുത്ത വെള്ളത്തില് കഴുകി കളയാം.