തിരുവനന്തപുരം: പണം ഇല്ല എന്ന കാരണത്താല് സ്കൂളിലെ ഒരു കുട്ടിയെപ്പോലും പഠനയാത്രയില് ഉള്പ്പെടുത്താതിരിക്കരുതെന്ന് മന്ത്രി വി.ശിവൻകുട്ടി നിർദ്ദേശം നല്കി.
വാർത്താക്കുറിപ്പില് ആണ് മന്ത്രി ഇക്കാര്യം അറിയിച്ചത്. സ്കൂളുകളില് പഠനയാത്രകള്, സ്കൂളുകളിലെ വ്യക്തിഗത ആഘോഷങ്ങള് എന്നിവ സംബന്ധിച്ച നിർദ്ദേശങ്ങള് അടിയന്തരമായി നടപ്പില് വരുത്തുന്നതിന് സ്വീകരിച്ച നടപടികളിന്മേല് ഒരാഴ്ചക്കുള്ളില് റിപ്പോർട്ട് നല്കാൻ മന്ത്രി പൊതു വിദ്യാഭ്യാസ വകുപ്പ് ഡയറക്ടറെ ചുമതലപ്പെടുത്തി.
സ്കൂള് പഠനയാത്രകള്, വിനോദയാത്രകള് മാത്രമാക്കി മാറ്റുന്ന അവസ്ഥയാണ് ഇപ്പോഴുള്ളത്. മാത്രമല്ല, ഇതിന് വൻതോതിലുള്ള തുകയാണ് ചില സ്കൂളുകളില് നിശ്ചയിക്കുന്നത്. ഇത് സാമ്പത്തികമായി പിന്നാക്കം നില്ക്കുന്ന വിദ്യാർത്ഥികള്ക്ക് നല്കാൻ കഴിയാതെ അവരില് മാനസിക പ്രയാസം ഉണ്ടാക്കുന്നു.
ആയതിനാല് പഠനയാത്രകള് എല്ലാ കുട്ടികള്ക്കും പ്രാപ്യമായ രീതിയില് ക്രമീകരിക്കണമെന്നും മന്ത്രി നിർദ്ദേശം നല്കി. സ്കൂളുകളിലെ പഠനയാത്രയോടൊപ്പം അകമ്പടിയായി പോകുന്ന അദ്ധ്യാപകരുടെയും പി.ടി.എ അംഗങ്ങളുടെയും യാത്രാ ചെലവ് ബന്ധപ്പെട്ട പി.ടി.എ കമ്മിറ്റികളോ സ്റ്റാഫ് മാനേജ്മെന്റ് കമ്മിറ്റികളോ വഹിക്കേണ്ടതാണ്.