കൊച്ചി: ബലാത്സംഗക്കേസില് അന്വേഷണ സംഘത്തിന് മുന്നില് ഹാജരാകാൻ കത്ത് നല്കി നടൻ സിദ്ദിഖ്.
കത്തിന്റെ അടിസ്ഥാനത്തില് നടനെ ചോദ്യം ചെയ്യുന്നതിന് വിളിപ്പിക്കും. അടുത്ത ആഴ്ച ചോദ്യം ചെയ്യലുണ്ടാകുമെന്നാണ് സൂചന. നോട്ടീസ് നല്കി വിളിപ്പിച്ച് സിദ്ദിഖിന്റെ മൊഴി രേഖപ്പെടുത്താനാണ് അന്വേഷണ സംഘം തീരുമാനിച്ചിരിക്കുന്നത്.
മുൻപ് സുപ്രീം കോടതിയുടെ പരിഗണനയില് മുൻകൂർ ജാമ്യാപേക്ഷ നിലനില്ക്കുന്നതിനാല് നോട്ടീസ് നല്കുന്നതില് പൊലീസ് തീരുമാനമെടുത്തിരുന്നില്ല. ഈ സാഹചര്യത്തിലാണ് ഹാജരാകാൻ തയാറാണെന്ന് സിദ്ദിഖ് തന്നെ അറിയിച്ചത്.
ഇത് നടന്റെ തന്ത്രപരമായ നീക്കമായാണ് അന്വേഷണ സംഘം വിലയിരുത്തുന്നത്. യുവനടിയുടെ പരാതിയിലാണ് സിദ്ദിഖിനെതിരെ ബലാത്സംഗത്തിന് കേസെടുത്തിരിക്കുന്നത്.