കല്പ്പറ്റ: സംസ്ഥാനത്ത് ഷിഗെല്ല കേസുകള് വര്ധിക്കുന്നു. വയനാട് കോളയാടി സ്കൂളില് ഏഴ് പേര്ക്ക് കൂടി ഷിഗെല്ല സ്ഥിരീകരിച്ചു. ഇതോടെ വയനാട്ടില് ഷിഗെല്ല സ്ഥിരീകരിച്ചവരുടെ എണ്ണം 16ആയി.
ഷിഗെല്ല കേസുകളില് ഈ വര്ഷത്തേത് അസാധാരണ സാഹചര്യമാണെന്നാണ് വിലയിരുത്തുന്നത്. 114 പേര്ക്കാണ് ഈ വര്ഷം രോഗം സ്ഥിരീകരിച്ചത്. കഴിഞ്ഞ വര്ഷം ഇതേ സമയത്ത് 54 പേര്ക്കാണ് രോഗം ബാധിച്ചത്.
നിലവില് 502 കുട്ടികളാണ് കോളിയാടിയില് രോഗലക്ഷണങ്ങളുമായി ചികിത്സ തേടിയിട്ടുള്ളത്. നിലവില് 47 പേര് ആശുപത്രിയില് ചികിത്സയില് തുടരുന്നുണ്ട്.
അതേസമയം, സമ്പര്ക്കത്തിലൂടെ രോഗം പകരുന്നത് ഒഴിവാക്കാന് മൂന്ന് പഞ്ചായത്തിലും ബത്തേരി നഗരസഭയിലും സ്കൂളുകള്ക്ക് അവധി നല്കിയിരിക്കുകയാണ്.
കുട്ടികളുമായി പുറത്തു പോകുന്നതും പരിപാടികളില് പങ്കെടുക്കുന്നതും ഒഴിവാക്കണമെന്ന് രക്ഷിതാക്കളോട് ആരോഗ്യവകുപ്പ് നിര്ദ്ദേശിച്ചിട്ടുണ്ട്.