കല്പറ്റ: സംസ്ഥാനത്ത് വരുംദിവസങ്ങളിലും ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
അതിതീവ്ര മഴയ്ക്ക് സാധ്യതയുള്ളതിനാല് കോഴിക്കോട്, വയനാട് ജില്ലകളില് ഇന്ന് (ചൊവ്വ) റെഡ് അലേർട്ട് പ്രഖ്യാപിച്ചു. അതീവ ജാഗ്രത പുലർത്തണമെന്ന് അധികൃതർ നിർദ്ദേശിച്ചു. ഇന്ന് മലപ്പുറം, കണ്ണൂർ, കാസർകോട് ജില്ലകളില് ഓറഞ്ച് അലേർട്ടാണ് നിലവിലുള്ളത്. എറണാകുളം, ഇടുക്കി, തൃശ്ശൂർ, പാലക്കാട് ജില്ലകളില് യെല്ലോ അലേർട്ടും പ്രഖ്യാപിച്ചു.
നാളെയും മറ്റന്നാളും സംസ്ഥാനത്തെ വിവിധ ജില്ലകളില് മഴ തുടരുമെന്നാണ് പ്രവചനം. നാളെ ആലപ്പുഴ മുതല് കാസർകോട് വരെയുള്ള പതിനൊന്ന് ജില്ലകളില് യെല്ലോ അലേർട്ടാണ്. വ്യാഴാഴ്ച മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും യെല്ലോ അലേർട്ട് നല്കിയിട്ടുണ്ട്.
ഒറ്റപ്പെട്ടയിടങ്ങളില് ശക്തമായ മഴയ്ക്ക് സാധ്യതയുള്ളതിനാല് താഴ്ന്ന പ്രദേശങ്ങളില് താമസിക്കുന്നവരും മലയോര മേഖലയിലുള്ളവരും പ്രത്യേക ജാഗ്രത പാലിക്കണമെന്ന് ദുരന്ത നിവാരണ അതോറിറ്റി അറിയിച്ചു.