തിരുവനന്തപുരം: സംസ്ഥാനത്ത് പള്സ് പോളിയോ ഇമ്മ്യൂണൈസേഷൻ ജൂണ് 28 ഞായറാഴ്ച നടക്കുമെന്ന് ആരോഗ്യ-ദേവസ്വം വകുപ്പ് മന്ത്രി കെ. മുരളീധരൻ അറിയിച്ചു.
പരിപാടിയുടെ ക്രമീകരണങ്ങള് പൂർത്തിയായതായും ജൂണ് 28ന് തന്നെ അഞ്ചുവയസ്സിനു താഴെയുളള എല്ലാ കുഞ്ഞുങ്ങള്ക്കും ഓരോ ഡോസ് തുള്ളിമരുന്ന് നല്കുന്നുവെന്ന് ഉറപ്പുവരുത്താൻ എല്ലാ മാതാപിതാക്കളും രക്ഷാകർത്താക്കളും ശ്രദ്ധിക്കണമെന്ന് അദ്ദേഹം അഭ്യർത്ഥിച്ചു.
പരിപാടിയുടെ സംസ്ഥാനതല ഉദ്ഘാടനം ആരോഗ്യ-ദേവസ്വം വകുപ്പ് മന്ത്രി കെ മുരളീധരൻ തൈക്കാട് മാതൃ-ശിശു ആശുപത്രിയില് ജൂണ് 28 ഞായറാഴ്ച രാവിലെ 8 നു നിർവ്വഹിക്കും.
ഗതാഗത വകുപ്പ് മന്ത്രി സി.പി. ജോണ് അധ്യക്ഷത വഹിക്കും, ഡോ. ശശി തരൂർ എം.പി, തിരുവനന്തപുരം കോർപറേഷൻ മേയർ വി.വി രാജേഷ് മുതിർന്ന ഉദ്യോഗസ്ഥർ തുടങ്ങിയവർ സംബന്ധിക്കും.
സംസ്ഥാനത്ത് അഞ്ചുവയസ്സിനു താഴെയുളള 19,80,224 കുട്ടികള്ക്കാണ് തുള്ളിമരുന്ന് നല്കുക. ഇതിനായി 22,288 ബൂത്തുകള് സജീകരിക്കും. തുള്ളിമരുന്ന് നല്കാൻ 46,663 സന്നദ്ധപ്രവർത്തകരെ പരിശീലനം നല്കി നിയോഗിക്കും.
സർക്കാർ ആശുപത്രികള്, ആരോഗ്യകേന്ദ്രങ്ങള്, ജനകീയ ആരോഗ്യ കേന്ദ്രങ്ങള്, നഗരാരോഗ്യ കേന്ദ്രങ്ങള്, അങ്കണവാടികള്, സ്വകാര്യ ആശുപത്രികള്, വായനശാലകള്, സ്കൂളുകള്, സന്നദ്ധ സംഘടനകളുടെ കെട്ടിടങ്ങള് എന്നിവയുള്പ്പെടെ ജനങ്ങള്ക്ക് ഏറ്റവും സൗകര്യപ്രദമായ സ്ഥലങ്ങളില് ബൂത്തുകള് ക്രമീകരിക്കും.