കൊച്ചി: കേരള ജനതയെ ഞെട്ടിച്ച ആലുവയിലെ അഞ്ചുവയസുകാരിയുടെ കൊലപാതകത്തില് അന്വേഷണവുമായി ബന്ധപ്പെട്ട് പ്രവര്ത്തിച്ച പൊലീസ് ഉദ്യോഗസ്ഥര്ക്ക് ജില്ലാ പൊലീസ് മേധാവിയുടെ ഗുഡ് വില് സര്ട്ടിഫിക്കറ്റ്.
48 പേര്ക്കാണ് അംഗീകാരം നല്കിയത്. ഇതില് ആലുവ ഡിവൈഎസ്പിയും രണ്ട് ഇന്സ്പെക്ടര്മാരും ഉള്പ്പെടും.
അഞ്ചുവയസുകാരിയെ അതിക്രൂരമായിട്ടാണ് ബലാത്സംഗം ചെയ്ത് പ്രതി കൊന്നു തള്ളിയത്. കേസില് പോലീസ് അന്വേഷണവും വിചാരണ നടപടികളും പൂര്ത്തിയായത് റെക്കോഡ് വേഗത്തില് ആണ്. പെണ്കുട്ടി കൊല്ലപ്പെട്ട് 36-ാം ദിവസമാണ് പ്രത്യേക അന്വേഷണസംഘം കോടതിയില് കുറ്റപത്രം സമര്പ്പിച്ചത്.
കേസിന്റെ ഗൗരവം കണക്കിലെടുത്ത് വിചാരണ ഉടന് തുടങ്ങണമെന്ന അപേക്ഷയും കോടതിയില് നല്കി. തുടര്ന്ന് ഒക്ടോബര് നാലിന് കോടതിയില് ആരംഭിച്ച വിചാരണ 26 ദിവസം കൊണ്ടാണ് പൂര്ത്തിയാക്കിയത്. കുറ്റകൃത്യം നടന്ന് 100-ാം ദിവസം കേസില് പ്രതി കുറ്റക്കാരനാണെന്ന് കണ്ടെത്തി.