പുതിയ നിയമം പ്രഖ്യാപിച്ച് ലക്ഷദ്വീപ്; ബുധനാഴ്ചകളിൽ ‘നോ വെഹിക്കിൾ ഡേ’, സൈക്കിൾ ഒഴികെ മറ്റൊരു വാഹനവും പുറത്തിറക്കാനാകില്ല

വാഹനങ്ങൾക്ക് നിയന്ത്രണം ഏർപ്പെടുത്തിക്കൊണ്ട് പുതിയ നിയമം കൊണ്ടുവന്നിരിക്കുകയാണ് ലക്ഷദ്വീപ്. ആരോഗ്യ സംരക്ഷണവും പരിസ്ഥിതി സൗഹൃദ ജീവിതശൈലിയും പ്രോത്സാഹിപ്പിക്കുന്നതിനായി ആഴ്ചയിലൊരിക്കൽ വാഹന നിയന്ത്രണം ഏർപ്പെടുത്തിക്കൊണ്ടാണ് ഭരണകൂടം ഉത്തരവിറക്കിയത്. എല്ലാ ബുധനാഴ്ചകളും ‘നോ വെഹിക്കിൾ ഡേ’ ആയി ആചരിക്കാനാണ് തീരുമാനം. ദ്വീപ് നിവാസികൾക്കിടയിൽ കാൽനടയാത്രയും സൈക്ലിംഗും പ്രോത്സാഹിപ്പിക്കുക വഴി ശാരീരിക ആരോഗ്യം മെച്ചപ്പെടുത്തുന്നതിനൊപ്പം അന്തരീക്ഷ മലിനീകരണം കുറയ്ക്കുക എന്നതുമാണ് ഈ പുതിയ നീക്കത്തിലൂടെ ലക്ഷദ്വീപ് ഭരണകൂടം ലക്ഷ്യമിടുന്നത്. ഈ മാസം 25ആം തീയതി മുതൽ പുതിയ നിർദ്ദേശം പ്രാബല്യത്തിൽ വരുമെന്നും ലക്ഷദ്വീപ് ഭരണകൂടം അറിയിച്ചു. പ്രകൃതിരമണീയമായ ദ്വീപിന്റെ ആവാസവ്യവസ്ഥയെ സംരക്ഷിക്കാനും ഇന്ധന ഉപഭോഗം കുറയ്ക്കാനും ഈ തീരുമാനം ഏറെ സഹായകമാകുമെന്നാണ് അധികൃതരുടെ വിലയിരുത്തൽ. ഇന്ത്യയിൽ തന്നെ ഇത്തരമൊരു നീക്കം ആദ്യമായിട്ടാണെന്നാണ് ലക്ഷദ്വീപ് ഭരണകൂട വൃത്തങ്ങൾ പറയുന്നത്.