രാജ്യസഭ തിരഞ്ഞെടുപ്പില് വിജയിച്ചതിന് പിന്നാലെ ബിഹാര് മുഖ്യമന്ത്രി നിതീഷ് കുമാര് എംഎല്സി സ്ഥാനം രാജിവച്ചു. മുഖ്യമന്ത്രി സ്ഥാനത്ത് നിന്നും രാജി ഉടന് ഉണ്ടാകുമെന്ന് ജെഡിയു അറിയിച്ചു. പുതിയ മുഖ്യമന്ത്രിയെ ബിജെപി ഉടന് കണ്ടെത്തും. ബിഹാറിന് പുതിയ മുഖ്യമന്ത്രിയായി ബിജെപിയില് നിന്ന് ആരെങ്കിലുമെത്തുമോ എന്നതാണ് ആകാംഷ നിറക്കുന്നത്. ബിജെപിയുടെ ഉപമുഖ്യമന്ത്രി സാമ്രാട്ട് ചൗധരിക്കാണ് മുഖ്യമന്ത്രി സ്ഥാനത്തേക്ക് സാധ്യത കൂടുതല്. അങ്ങനെയെങ്കിൽ ബിഹാറിന്റെ ചരിത്രത്തില് ആദ്യമായാണ് ബിജെപി മുഖ്യമന്ത്രി എത്തുന്നത്.
രണ്ട് പതിറ്റാണ്ടിലധികം മുഖ്യമന്ത്രി കസേരയിലിരുന്ന ബിഹാര് രാഷ്ട്രീയത്തിലെ അതികായനാണ് നിതീഷ് കുമാര്. പത്താംതവണ മുഖ്യമന്ത്രി കസേരയിലെത്തി നാലുമാസത്തിന് ശേഷമാണ് നിതീഷ് കുമാറിന്റെ രാജി. 2005ലാണ് അദ്ദേഹം ആദ്യമായി മുഖ്യമന്ത്രിയായത്. നിതീഷ് കുമാറിന് രാജ്യസഭയിലേക്ക് തിരഞ്ഞെടുക്കപ്പെടാന് ആഗ്രഹമില്ല എന്നും എന്നാല് സഖ്യകക്ഷിയായ ബിജെപിയുടെ നിര്ബന്ധപ്രകാരമാണ് രാജ്യസഭയിലേക്ക് പോകുന്നതെന്നാണ് ആര്ജെഡി വര്ക്കിംഗ് പ്രസിഡന്റ് തേജസ്വി യാദവ് അവകാശപ്പെട്ടത്. ജെഡിയുവിനെ ഇല്ലാതാക്കാനാണ് ബിജെപി ശ്രമമെന്നും അദ്ദേഹം ആരോപിച്ചിരുന്നു.