ലോകമെമ്പാടുമുള്ള ആളുകൾ പുതുവത്സരത്തെ വരവേൽക്കാനൊരുങ്ങി. സംസ്ഥാനത്ത് ഏറ്റവും വലിയ ആഘോഷം നടക്കുന്ന ഫോര്ട്ട് കൊച്ചിയില് ഉള്പ്പെടെ എല്ലാ ഒരുക്കങ്ങളും പൂര്ത്തിയായി. കോവളം, ഫോര്ട്ട് കൊച്ചി, കോഴിക്കോട് ബീച്ച് ഉള്പ്പെടെ പ്രധാന കേന്ദ്രങ്ങളില് സുരക്ഷ ശക്തമാക്കിയിട്ടുണ്ട്. ഫോര്ട്ട് കൊച്ചിയില് പരേഡ് ഗ്രൗണ്ടിന് പുറമേ ഇക്കുറിയും വെളി മൈതാനത്ത് പാപ്പാഞ്ഞിയെ കത്തിച്ച് പുതുവര്ഷത്തെ വരവേല്ക്കും. മൂന്നാറില് ഹോംസ്റ്റേകളില് ഉള്പ്പെടെ ഇതിനകം ബുക്കിങ്ങ് നിറഞ്ഞ് കഴിഞ്ഞു. ഡല്ഹിയിലും മുംബൈയിലും ചെന്നൈയിലും വിപുലമായ ന്യൂഇയര് ആഘോഷങ്ങളാണ് നടക്കുന്നത്.
ഇന്ത്യന് സമയം ഇന്ന് ഉച്ചതിരിഞ്ഞ് മൂന്നരയോടെ ലോകം പുതുവത്സരം ആഘോഷിച്ച് തുടങ്ങും. റിപ്പബ്ലിക് ഓഫ് കിരിബാസിലെ ക്രിസ്മസ് ഐലന്ഡിലാണ് പുതുവത്സരം ആദ്യം പിറക്കുന്നത്. ന്യൂസിലന്ഡിലെ ചാറ്റം ഐലണ്ടിലും ഫിജിയിലും ഓസ്ട്രേലിയയിലെ മെല്ബണിലും സിഡ്നിയിലും കാന്ബെറയിലും ഒക്കെയാണ് അടുത്തതായി പുതുവത്സരം പിറക്കുന്നത്. ഇന്ത്യൻ സമയം രാത്രി 11 മണിയോടെ മ്യാന്മറിലും പതിനൊന്നരയോടെ ബംഗ്ലാദേശിലും പതിനൊന്നേ മുക്കാലോടെ നേപ്പാളിലും പുതുവത്സരമെത്തിയശേഷമാണ് ഇന്ത്യയില് പുതുവത്സരമെത്തുക. അമേരിക്കയിലെ ബേക്കര് ഐലണ്ടിലും ഹൗലന്ഡ് ഐലണ്ടിലുമാണ് ഏറ്റവുമൊടുവില് പുതുവത്സരമെത്തുന്നത്. നാളെ ഇന്ത്യന് സമയം വൈകിട്ട് അഞ്ചരയ്ക്കു മാത്രമേ അവിടെ പുതുവര്ഷമെത്തൂ.