കൊച്ചി: ഇന്ത്യൻ വിപണിയിലേക്ക് മഹീന്ദ്രയുടെ ഏറ്റവും പുതിയ 7 സീറ്റർ ഇലക്ട്രിക് എസ്യുവി, XEV 9S, നവംബർ 27-ന് അരങ്ങേറ്റം കുറിക്കും.
2025-ല് വിപണിയിലെത്തുന്ന ഈ വാഹനം, മുൻപ് മഹീന്ദ്ര XEV 7e എന്ന പേരില് അറിയപ്പെട്ടിരുന്ന XEV 9e-യുടെ ഏഴ് സീറ്റർ പതിപ്പാണ്. ബിവൈഡി അറ്റോ 3, ടാറ്റ ഹാരിയർ ഇവി തുടങ്ങിയ മോഡലുകളുമായിട്ടാണ് XEV 9S മത്സരിക്കുക. ഏകദേശം 21 ലക്ഷം രൂപ മുതലായിരിക്കും ഇതിന്റെ പ്രാരംഭ വില പ്രതീക്ഷിക്കുന്നത്.
പുതിയ XEV 9S, ഇൻഗ്ലോ സ്കേറ്റ്ബോർഡ് പ്ലാറ്റ്ഫോമിനെ അടിസ്ഥാനമാക്കിയാണ് നിർമ്മിക്കുന്നത്. XEV 9e മോഡലില് നിന്ന് വ്യത്യസ്തമായി, ഇതില് മൂന്നാം നിര സീറ്റുകള് ഉള്പ്പെടുത്തിയിട്ടുണ്ട്. വാഹനത്തിന്റെ ക്യാബിൻ ലേഔട്ടും മറ്റു സവിശേഷതകളും XEV 9e-യുടേതിന് സമാനമായിരിക്കും.
ട്രിപ്പിള് സ്ക്രീൻ ഡിസ്പ്ലേ, പ്രകാശിക്കുന്ന ലോഗോയോടുകൂടിയ 2-സ്പോക്ക് സ്റ്റിയറിംഗ് വീല്, ഡ്യുവല്-സോണ് ക്ലൈമറ്റ് കണ്ട്രോള്, പനോരമിക് സണ്റൂഫ്, വെന്റിലേഷനോടുകൂടിയ പവർഡ് ഫ്രണ്ട് സീറ്റുകള്, ഹെഡ്-അപ്പ് ഡിസ്പ്ലേ, 16 സ്പീക്കറുകളുള്ള ഹർമൻ / കാർഡണ് സൗണ്ട് സിസ്റ്റം, ലെവല്-2 ADAS തുടങ്ങിയ നിരവധി നൂതന ഫീച്ചറുകള് ഇതില് ഉള്ക്കൊള്ളും. സുരക്ഷയുടെ കാര്യത്തിലും വിട്ടുവീഴ്ച വരുത്താതെ, 7 എയർബാഗുകള്, ഇലക്ട്രോണിക് സ്റ്റെബിലിറ്റി കണ്ട്രോള്, 360-ഡിഗ്രി ക്യാമറ തുടങ്ങിയ സംവിധാനങ്ങളും വാഹനത്തിലുണ്ട്.
XEV 9e-യില് നിന്ന് വ്യത്യസ്തമായ പവർട്രെയിൻ ഓപ്ഷനുകളാണ് XEV 9S-ല് പ്രതീക്ഷിക്കുന്നത്. 59kWh, 79kWh എന്നിങ്ങനെ രണ്ട് ബാറ്ററി പാക്കുകളില് വാഹനം ലഭ്യമാകും. 59kWh ബാറ്ററിക്ക് 307 bhp കരുത്തും 435 കിലോമീറ്റർ റേഞ്ചും നല്കാൻ ശേഷിയുണ്ട്. ഉയർന്ന ബാറ്ററി പാക്ക് 378 bhp കരുത്തും 540 കിലോമീറ്റർ വരെ റേഞ്ചും വാഗ്ദാനം ചെയ്യുന്നു. ഒരു ചാർജില് 500 കിലോമീറ്ററിലധികം സഞ്ചരിക്കാൻ സാധിക്കുന്ന ഒരു ഇലക്ട്രിക് എസ്യുവി എന്ന നിലയില് XEV 9S വിപണിയില് ശ്രദ്ധേയമാകും.