തിരുവനന്തപുരം: പ്രമുഖ വ്യവസായി എംഎ യൂസഫലിയുടെ പേരില് പത്തനംതിട്ട ജില്ലയില് ജോലി തട്ടിപ്പ്.
30000 രൂപ പ്രതിമാസം ശമ്പളം വാഗ്ദാനം ചെയ്തുള്ള ജോലിയെക്കുറിച്ച് ഫേസ്ബുക്കിലാണ് പരസ്യം പങ്കുവച്ചിരിക്കുന്നത്.
നിരവധി പേർ തട്ടിപ്പിന് ഇരയായിട്ടുണ്ടെന്നാണ് സൂചന. തട്ടിപ്പിന് പിന്നില് ആരാണെന്നത് കണ്ടെത്താനായിട്ടില്ല.
മാരാമണ് സ്വദേശിയായ ഷാജി സൈമണ് എന്നയാളാണ് തട്ടിപ്പ് സംബന്ധിച്ച് വിവരങ്ങള് പുറത്തുവിട്ടത്.
ഫേസ്ബുക്കില് എംഎ യുസഫലിയുടെ ചിത്രം ഉള്പ്പെടെ ചേർത്താണ് പോസ്റ്റർ പങ്കുവെച്ചിരിക്കുന്നത്.
പോസ്റ്ററിനോടൊപ്പം ഒരു ലിങ്കും പങ്കുവെച്ചിരുന്നു. ലിങ്ക് ക്ലിക്ക് ചെയ്യുമ്പോള് വാട്സ്ആപ്പ് അക്കൗണ്ടിലേക്കാണ് പോയത്. പോസ്റ്ററിനൊപ്പം ഒരു ഫോണ് നമ്പറും നല്കിയിരുന്നു.
ജോലിയെ സംബന്ധിച്ച് കൂടുതല് വിവരങ്ങളറിയാൻ ലഭിച്ച ഫോണ് നമ്പറില് ഷാജി ബന്ധപ്പെട്ടു. ഹിന്ദിയിലായിരുന്നു സംഭാഷണം. നടരാജ് പെൻസില് കമ്പനിയിലേക്കാണ് ജോലി ഒഴിവെന്നും താത്പര്യമുണ്ടോ എന്ന് ചോദിച്ചുവെന്നും ഷാജി പറയുന്നു.