വയനാട്: കാത്തിരിപ്പുകള്ക്ക് ഒടുവില് തിരുവോണം ബമ്പർ നറുക്കെടുപ്പ് നടന്നിരിക്കുകയാണ്.
TG 434222 എന്ന നമ്പറിനാണ് ഒന്നാം സമ്മാനം. വയനാട് ബത്തേരിയിലെ എൻജിആർ ലോട്ടറീസ് നടത്തുന്ന നാഗരാജ് ആണ് ടിക്കറ്റ് വിറ്റിരിക്കുന്നത്. താൻ വിറ്റ ടിക്കറ്റിന് സമ്മാനം ലഭിച്ചതില് അതിയായ സന്തോഷമെന്ന് നാഗരാജ് പറഞ്ഞു.
ഒരുമാസം മുൻപാണ് ടിക്കറ്റ് വിറ്റതെന്നും ആരാണ് വാങ്ങിയതെന്ന് ഓർമയില്ലെന്നും നാഗരാജ് പറഞ്ഞു.
“ഒന്നും പറയാൻ പറ്റുന്നില്ല. ആദ്യമായിട്ടാണ് സാർ.. കയ്യും കാലും വിറയ്ക്കുന്നുണ്ട്. പേടിയാണോ എന്താണ് എന്നൊന്നും അറിയില്ല.
മൈസൂര് ജില്ലയില് ഉള്സഗള്ളി എന്ന ഗ്രാമത്തിലാണ് എന്റെ വീട്. കൂലിപ്പണിക്കായി കേരളത്തില് വന്നതാണ്. ഇപ്പോള് 15 വര്ഷമായി. ഈ വർഷത്തില് 10 വർഷം നിരവധി ലോട്ടറി കടകളില് ഞാൻ ജോലി ചെയ്തിട്ടുണ്ട്.
ആദ്യം ഒരു ഹോട്ടലില് ആയിരുന്നു ജോലി ചെയ്തത്. ശേഷം സുല്ത്താൻ ബത്തേരിയിലെ ബസ് സ്റ്റാന്റില് കാല് വയ്യാത്ത ഒരാള്ക്കൊപ്പം ലോട്ടറി വിറ്റു. അഞ്ച് വർഷം ആയതേ ഉള്ളൂ സ്വന്തമായി ഷോപ്പ് തുടങ്ങിയിട്ട്. സുല്ത്താൻ ബത്തേരിയിലെ എംജി റോഡിലാണ് ഷോപ്പ്. നാഗരാജ് എന്ന എന്റെ പേരിലെ മൂന്ന് അക്ഷരങ്ങളാണ് കടയ്ക്കും കൊടുത്തിരിക്കുന്നത്. ജൂലൈയില് ഞാൻ വിറ്റ ടിക്കറ്റിന് 75 ലക്ഷം രൂപ ഒന്നാം സമ്മാനം അടിച്ചിരുന്നു. വീണ്ടും വീണ്ടും ഭാഗ്യം തേടി വരികയാണ്. മലയാളികള് മാത്രമല്ല തമിഴ്നാട്ടുകാരും ടിക്കറ്റ് എടുക്കുന്നുണ്ട്”, എന്ന് നാരഗാജ് പറയുന്നു.