മലപ്പുറം : മലപ്പുറം ജില്ലയിലെ എടവണ്ണപ്പാറയിലാണ് കേസിനാസ്പദമായ സംഭവം. സംഭവത്തില് സുഹൃത്തിനെ അറസ്റ്റ് ചെയ്തുു. ഓമാനൂർ സ്വദേശി പള്ളിപ്പുറായ നീറയില് പി.കെ. ഷമീം (23) ആണ് അറസ്റ്റിലായത്. തിങ്കളാഴ്ച രാത്രിയോടെയാണ് സംഭവം നടന്നത്. ഓമാനൂർ പള്ളിപ്പുറായ പാറപള്ളിയാളി ഫൈസല് അവധി കഴിഞ്ഞ്
തിരിച്ച് പോകുന്നതിനിടെയാണ് സുഹൃത്ത് ഷമീം ഇറച്ചിയും മറ്റും അടങ്ങിയ പെട്ടിയില് കഞ്ചാവ് വെച്ച് കൊടുത്തയക്കാൻ ശ്രമിച്ചത്. യാത്രക്കുള്ള ലഗേജ് ഒരുക്കുന്നതിനിടെ ഷമീം നല്കിയ പെട്ടിയിലെ വസ്തുക്കള് മാറ്റി പായ്ക്ക് ചെയ്യാൻ അഴിച്ചപ്പോഴാണ് ഫൈസലിന് ചതി മനസ്സിലായത്.
തുടർന്ന് വിശദമായി പരിശോധന നടത്തിയപ്പോഴാണ് പ്ലാസ്റ്റിക്ക് പായ്ക്കില് പ്ലാസ്റ്ററിട്ട് ഒട്ടിച്ച നിലയില് കഞ്ചാവടങ്ങിയ ബോട്ടില് കണ്ടെത്തിയത്. ഉടൻ ഫൈസല് വാഴക്കാട് സ്റ്റേഷനിലെത്തി പരാതി നല്കുകയായിരുന്നു.