കോട്ടയം: മെഡിക്കൽ കോളേജ് ഫൊറൻസിക് വിഭാഗം മേധാവി മാനസികമായി പീഡിപ്പിക്കുന്നെന്നു കാട്ടി പിജി വിദ്യാർത്ഥി മുഖ്യമന്ത്രിക്കും ആരോഗ്യമന്ത്രിക്കും മനുഷ്യാവകാശ കമ്മിഷനും പരാതി നൽകി.
ഫൊറൻസിക് മേധാവി ഡോ. ലിസ ജോണിനെതിരെ ഫൊറൻസിക് പിജി വിദ്യാർത്ഥി ഡോ. വിനീത് കുമാറാണു പരാതി നൽകിയത്.
നിരന്തരം മാനസികമായി പീഡിപ്പിക്കുന്നു, പരീക്ഷയിൽ തോൽപിക്കുമെന്നു പറഞ്ഞു ഭീഷണിപ്പെടുത്തുന്നു, പരസ്യമായി അസഭ്യം വിളിക്കുന്നു തുടങ്ങിയ ആരോപണങ്ങളാണു പരാതിയിലുള്ളത്.
യുവജന കമ്മിഷനും പരാതി കൊടുത്തിട്ടുണ്ട്. ഡിജിറ്റൽ തെളിവുകളും പരാതിക്കൊപ്പം കൈമാറി. നേരത്തേ ആശുപത്രി അധികൃതർക്കു നൽകിയ പരാതിയിൽ നടപടി ഉണ്ടായില്ലെന്നും വിനീത് പറയുന്നു.