കൊച്ചി: കൊടും ചൂടില് വെന്തുരുകിയ കൊച്ചിക്ക് ആശ്വാസമായി ജില്ലയുടെ വിവിധ ഭാഗങ്ങളില് ശക്തമായ വേനല് മഴയെത്തി.
ശക്തമായ കാറ്റിമൊപ്പമെത്തിയ മഴയില് ആലുവയിലടക്കം ജില്ലയില് പലയിടത്തും മരങ്ങള് കടപുഴകി.
ശക്തമായ കാറ്റില് മരങ്ങള് വീണതിനെത്തുടർന്ന് ചില പ്രദേശങ്ങളില് ഗതാഗതവും വൈദ്യുതി ബന്ധവും തടസ്സപ്പെട്ടു. ഒരു മണിക്കൂറിലധികം സമയം നഗരത്തിന്റെ വിവിധ ഭാഗങ്ങളില് മഴ തകർത്ത് പെയ്തു.
കൊച്ചി നഗരത്തിലും പരിസര പ്രദേശങ്ങളിലും പെയ്ത മഴ ചൂടിന് വലിയ ശമനമാണ് നല്കിയത്.
അതിനിടെ സംസ്ഥാനത്ത് 22 -ാം തിയതി വരെ ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
