തൃശൂര്: കരുവന്നൂര് കള്ളപ്പണയിടപാടുമായി ബന്ധപ്പെട്ട് കൂടുതല് കടുപ്പിച്ച് എൻഫോഴ്സ്മെന്റ് ഡയറക്ട്രറേറ്റ്.
സിപിഎം നേതാവും തൃശൂര് കോ ഓപ്പറേറ്റീവ് ബാങ്ക് പ്രസിഡന്റും കേരളാ ബാങ്ക് വൈസ് പ്രസിഡന്റുമായ എം.കെ കണ്ണൻ സ്വത്ത് വിവരങ്ങള് ഹാജരാക്കണമെന്നാവശ്യപ്പെട്ട് ഇഡി നോട്ടീസ് നല്കി.
വ്യാഴാഴ്ചയ്ക്കുള്ളില് കുടുംബത്തിന്റെയടക്കം സ്വത്ത് വിവരം ഹാജരാക്കാനാണ് ഇഡി നിര്ദ്ദേശം. എം.കെ കണ്ണൻ പ്രസിഡന്റായി തുടരുന്ന തൃശൂര് കോ -ഓപ്പറേറ്റീവ് ബാങ്കിലാണ് കരുവന്നൂര് കേസിലെ മുഖ്യപ്രതി സതീഷ് കുമാര് മിക്ക ഇടപാടും നടത്തിയിട്ടുള്ളത്.
കോടികളുടെ ഇടപാട് രേഖകള് ഈ ബാങ്കില് കഴിഞ്ഞ ദിവസം നടത്തിയ റെയിഡില് പിടിച്ചെടുത്തിരുന്നു. ഇതുമായി ബന്ധപ്പെട്ട് വിശദാംശങ്ങള് തേടാൻ കണ്ണനെ വിളിച്ചുവരുത്തി ചോദ്യം ചെയ്യുകയുമുണ്ടായി. പിന്നാലെയാണ് സ്വത്ത് വിവരം ഹാജരാക്കാൻ നിര്ദ്ദേശം നല്കിയത്.