ചരിത്രത്തിലാദ്യമായി സംസ്ഥാനത്ത് സ്വർണവില ഒരു ലക്ഷംകടന്നിരിക്കുകയാണ്. പവന് ഒരു ലക്ഷത്തി ആയിരത്തി അറുന്നൂറ് രൂപയായി. ഇന്ന് ഒറ്റയടിക്ക് 1760 രൂപയാണ് പവന് ഇന്ന് കൂടിയത്. ഗ്രാമിന് 12,700 രൂപയാണ് വില. ഈ വർഷം മാത്രം കൂടിയത് 44, 800 രൂപയാണ്. കഴിഞ്ഞ ദിവസം രണ്ട് തവണയാണ് സ്വർണ വില കൂടിയത്. 1440 രൂപയാണ് വര്ധിച്ചത്. പണിക്കൂലിയും നികുതിയും ഉള്പ്പെടെ നേരത്തെ തന്നെ സ്വര്ണ വില ഒരു ലക്ഷം കടന്നിരുന്നു.
ഈ മാസത്തിന്റെ തുടക്കത്തില് 95,680 രൂപയായിരുന്നു ഒരു പവന് സ്വര്ണത്തിന്റെ വില. 9ആം തീയതി ആയതോടെ 94,920 രൂപയായി ഇടിഞ്ഞ് ഈ മാസത്തെ ഏറ്റവും താഴ്ന്ന നിലവാരത്തില് എത്തിയിരുന്നെങ്കിലും പിന്നീടങ്ങോട് സ്വർണവില കുതിക്കുകയായിരുന്നു. ആഗോള ഭൗമ രാഷ്ട്രീയ പ്രതിസന്ധികള്ക്കിടയില് സ്വര്ണം സുരക്ഷിത നിക്ഷേപമായി തുടരുന്നതാണ് സ്വര്ണവിലക്കുതിപ്പിന് കാരണമായത്. ലോകത്തെ ഏറ്റവും വലിയ സ്വര്ണ ഉപഭോക്താക്കളാണ് ഇന്ത്യ. ഓരോ വര്ഷവും ടണ് കണക്കിന് സ്വര്ണം രാജ്യത്ത് ഇറക്കുമതി ചെയ്യുന്നുണ്ട്. അതുകൊണ്ട് ആഗോള വിപണിയില് സംഭവിക്കുന്ന ചെറിയ ചലനങ്ങള് പോലും അടിസ്ഥാനപരമായി ഇന്ത്യയിലെ സ്വര്ണവിലയില് പ്രതിഫലിക്കും.