കൊച്ചി: ആലുവ ചൂർണിക്കരയില് 10 വയസുകാരിക്ക് പൊള്ളലേറ്റു. ഇതര സംസ്ഥാനക്കാരായ അമിനുല്- ജൂലിയത്തുല് ദമ്പതികളുടെ മകളായ ഖദീജയ്ക്കാണ് പൊള്ളലേറ്റത്.
40 ശതമാനം പൊള്ളലേറ്റ കുട്ടി കോട്ടയം മെഡിക്കല് കോളേജ് ആശുപത്രിയില് ചികിത്സയിലാണ്.ഉച്ചയ്ക്ക് ഒരു മണിയോടെ അമ്മ വസ്ത്രം അലക്കി കൊണ്ടിരിക്കുമ്പോള് ഭക്ഷണം കഴിക്കാൻ സ്വന്തമായി ഓംലെറ്റ് ഉണ്ടാക്കാൻ ഗ്യാസ് സിലിണ്ടർ ഓണാക്കുകയായിരുന്നു കുട്ടി. ലീക്കുണ്ടായിരുന്ന റെഗുലേറ്ററിലൂടെ ഗ്യാസ് ശക്തമായി പുറത്തേക്ക് തള്ളുകയും ലൈറ്റർ ഉപയോഗിച്ച് അടുപ്പ് കത്തിക്കാൻ ശ്രമിച്ചതോടെ കുട്ടിക്ക് പൊള്ളലേല്ക്കുകയും ആയിരുന്നുവെന്ന് മാതാപിതാക്കള് പറയുന്നു.
ഉടനെ ആലുവ ജില്ലാ ആശുപത്രിയിലും തുടർന്ന് കളമശ്ശേരി മെഡിക്കല് കോളേജിലും അവിടെ നിന്നും കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിച്ചു. തായിക്കാട്ടുകര സ്കൂളിലെ വിദ്യാർത്ഥിയായിരുന്നു ഖദീജ. ഏതാനും നാളുകളായി സ്കൂളില് പോകാറില്ലായിരുന്നുവെന്ന് പ്രദേശവാസികള് പറയുന്നു.