തിരുവനന്തപുരം: പൊതുപരീക്ഷാ മൂല്യനിര്ണയത്തിനെതിരെ പുറത്തുവന്ന തന്റെ ശബ്ദരേഖയില് പൊതുവിദ്യാഭ്യാസ ഡയറക്ടര് ഇന്ന് വിദ്യാഭ്യാസമന്ത്രിക്ക് റിപ്പോര്ട്ട് നല്കിയേക്കും.
അക്ഷരം കൂട്ടിവായിക്കാനറിയാത്ത വിദ്യാര്ത്ഥികള്ക്കും എ പ്ലസ് കിട്ടുന്നുവെന്ന എസ്.ഷാനവാസിന്റെ ശബ്ദരേഖ പുറത്തുവന്നിരുന്നു. ഇതിന് പിന്നാലെയാണ് മന്ത്രി വി.ശിവൻകുട്ടി റിപ്പോര്ട്ട് തേടിയത്.
കുട്ടികളുടെ പഠനനിലവാരം സംബന്ധിച്ച ശബ്ദരേഖ ജനങ്ങള്ക്കിടയില് ആശയക്കുഴപ്പം ഉണ്ടാക്കിയിട്ടുണ്ടെന്നാണ് മന്ത്രിയുടെ പ്രതികരണം. ഡിജിഇ പറഞ്ഞത് സര്ക്കാര് അഭിപ്രായം അല്ലെന്നും മന്ത്രി ഇന്നലെ പറഞ്ഞിരുന്നു.
അതേസമയം എസ്.ഷാനവാസിന്റെ ശബ്ദരേഖ പുറത്തുവന്നതില് അദ്ദേഹത്തോട് തന്നെ റിപ്പോര്ട്ട് തേടിയതില് അധ്യാപക സംഘടനകള്ക്ക് എതിര്പ്പുണ്ട്. എസ്എസ്എല്സി ചോദ്യപേപ്പര് തയ്യാറാക്കലിന് മുന്നോടിയായുള്ള ശില്പശാലയിലായിരുന്നു എസ്.ഷാനവാസിന്റെ വിമര്ശനം.