എസ്എന്ഡിപി യോഗം നേതാവ് വെള്ളാപ്പള്ളി നടേശനെ സന്ദര്ശിച്ച മന്ത്രി ബിന്ദു കൃഷ്ണയുടെ നടപടിയെ വിമര്ശിച്ച് യൂത്ത് കോണ്ഗ്രസ് സംസ്ഥാന ജനറല് സെക്രട്ടറി ദുല്ഖിഫില് വിപി. വെള്ളാപ്പള്ളി നടേശനെ സന്ദര്ശിച്ച വാര്ത്തയും ചിത്രങ്ങളും കാണുമ്പോള് ശക്തമായ പ്രതിഷേധവും നിരാശയും പ്രയാസവുമാണ് സാധാരണ പ്രവര്ത്തകര്ക്കുള്ളതെന്ന് ദുല്ഖിഫില് പ്രതികരിച്ചു. ഈ സന്ദര്ശനത്തെ പൂര്ണ്ണമായി അപലപിക്കുന്നുവെന്നും ദുല്ഖിഫില് ഫേസ്ബുക്കില് കുറിച്ചു.
വെള്ളാപ്പള്ളി നടേശന് സംസ്ഥാനം ഭരിക്കുന്ന മുഖ്യമന്ത്രിയെയും ഇവിടെ വളരെ സൗഹാര്ദ്ദപരമായി ജീവിക്കുന്ന ഒരു സമുദായത്തെയും ഒരു ജില്ലയെയും അങ്ങേയറ്റം വര്ഗീയമായി അധിക്ഷേപിക്കുകയും തെറ്റായ പ്രചാരണം നടത്തുകയും ചെയ്തത് നമ്മുടെ മുന്നിലുള്ള യാഥാര്ത്ഥ്യമാണ്. ആ വിദ്വേഷ പരാമര്ശങ്ങള് തിരുത്താന് അദ്ദേഹം ഇതുവരെ തയ്യാറായിട്ടില്ലെന്നും ദുല്ഖിഫില് വ്യക്തമാക്കി. ഭരണഘടനയെ തൊട്ട് സത്യപ്രതിജ്ഞ ചെയ്ത ഒരു മന്ത്രിയില് നിന്നും, കോണ്ഗ്രസ് പ്രസ്ഥാനത്തില് നിന്നും കേരളം പ്രതീക്ഷിക്കുന്ന ചില രാഷ്ട്രീയ മാന്യതകളുണ്ട്. വോട്ട് ബാങ്ക് ലക്ഷ്യങ്ങള്ക്കപ്പുറം മതേതര നിലപാടുകളില് ഉറച്ചുനില്ക്കുക എന്നത് ഈ കാലഘട്ടത്തില് വളരെ പ്രധാനമാണ്. ഫാസിസത്തിനെതിരെയും വര്ഗീയതയ്ക്കെതിരെയും തെരുവില് പോരാടുന്ന സാധാരണക്കാരായ പ്രവര്ത്തകര്ക്ക് എപ്പോഴും ആവേശം നല്കേണ്ടത് താങ്കളെപ്പോലുള്ള മുതിര്ന്ന നേതാക്കളുടെ കൃത്യമായ നിലപാടുകളാണെന്നും ദുല്ഖിഫില് പറഞ്ഞു.