കണ്ണൂർ: കണ്ണൂര് മുൻ ജില്ലാ പഞ്ചായത്ത് പ്രസിഡന്റ് പി പി ദിവ്യയ്ക്ക് ജാമ്യ വ്യവസ്ഥകളില് ഇളവ്.
കണ്ണൂർ ജില്ല വിട്ടുപോകുന്നതിന് തടസമില്ലെന്നും ജില്ലാ പഞ്ചായത്ത് യോഗങ്ങളില് പങ്കെടുക്കാമെന്നും ഇളവുകളില് പറയുന്നു.
തിങ്കളാഴ്ചകളില് അന്വേഷണ ഉദ്യോഗസ്ഥന് മുൻപില് ഹാജരാകണമെന്ന വ്യവസ്ഥക്കും ഇളവ് നല്കിയിട്ടുണ്ട്.
ആവശ്യപ്പെടുമ്പോള് മാത്രം ഹാജരായാല് മതി. തലശ്ശേരി സെഷൻസ് കോടതിയില് നല്കിയ അപേക്ഷയിലാണ് ഉത്തരവ് പുറത്തുവന്നിരിക്കുന്നത്. കണ്ണൂർ എഡിഎം നവീൻ ബാബുവിന്റെ ആത്മഹത്യയുമായി ബന്ധപ്പെട്ട കേസില് പ്രതി ചേർക്കപ്പെട്ട ദിവ്യയ്ക്ക് ജാമ്യം ലഭിച്ചിരുന്നു.
യാത്രയയപ്പ് യോഗത്തില് ജില്ലാ പഞ്ചായത്ത് പ്രസിഡന്റായിരുന്ന പി പി ദിവ്യ, പരസ്യമായി അധിക്ഷേപിച്ചതിന് പിന്നാലെ എഡിഎം നവീൻ ബാബു ആത്മഹത്യ ചെയ്തത്. ഒക്ടോബര് 14 ന് നടന്ന യാത്രയയപ്പ് യോഗത്തിലായിരുന്നു വിവാദങ്ങളുടെ തുടക്കം.
യോഗത്തിലേക്ക് ക്ഷണിക്കാതെ എത്തിയ ജില്ലാ പഞ്ചായത്ത് അധ്യക്ഷ സ്ഥലംമാറ്റത്തിന്റെ സന്തോഷം തല്ലിക്കെടുത്തി ആക്ഷേപങ്ങള് ചൊരിഞ്ഞു. തുടര്ന്ന് കിട്ടിയ ഉപഹാരങ്ങള് പോലും എടുക്കാതെയാണ് നവീൻ ബാബു കളക്ടറേറ്റ് വിട്ടിറങ്ങിയത്.